ویمنز ٹی20 ورلڈ کپ کا فائنل سج گیا؛ لارڈز میں آسٹریلیا اور انگلینڈ آمنے سامنے ہوں گے

لندن(ویب ڈیسک) آئی سی سی ویمنز ٹی20 ورلڈ کپ کا سنسنی خیز فائنل اتوار کو تاریخی لارڈز کرکٹ گراؤنڈ میں کھیلا جائے گا، جہاں دفاعی چیمپئن آسٹریلیا اور میزبان انگلینڈ ٹائٹل کے لیے مدمقابل ہوں گے۔

پہلے سیمی فائنل میں آسٹریلیا نے ویسٹ انڈیز کو 8 وکٹوں سے شکست دے کر فائنل میں جگہ بنائی۔ اوول میں کھیلے گئے میچ میں ویسٹ انڈیز نے پہلے بیٹنگ کرتے ہوئے 7 وکٹوں پر 125 رنز بنائے، جس کا آسٹریلیا نے صرف دو وکٹوں کے نقصان پر 13ویں اوور میں ہی کامیابی سے تعاقب کر لیا۔

دوسرے سیمی فائنل میں انگلینڈ نے جنوبی افریقہ کو 40 رنز سے شکست دے کر فائنل کا ٹکٹ حاصل کیا۔ میزبان ٹیم نے پہلے بیٹنگ کرتے ہوئے 5 وکٹوں پر 169 رنز اسکور کیے، جبکہ ہدف کے تعاقب میں جنوبی افریقہ مقررہ 20 اوورز میں 8 وکٹوں پر 129 رنز ہی بنا سکی۔

دوسری جانب میری لیبون کرکٹ کلب (MCC) نے اپنے اراکین سے اپیل کی ہے کہ وہ اتوار کو لارڈز میں ہونے والا فائنل دیکھنے کے لیے بھرپور تعداد میں اسٹیڈیم آئیں۔

ایم سی سی 2017 جیسی صورتحال سے بچنا چاہتی ہے، جب انگلینڈ کی تاریخی فتح کے باوجود ممبرز اسٹینڈ کی متعدد نشستیں خالی رہ گئی تھیں، جس پر کلب کو شدید تنقید کا سامنا کرنا پڑا تھا۔

اب شائقین کرکٹ کی نظریں لارڈز پر مرکوز ہیں، جہاں دو مضبوط ٹیمیں عالمی اعزاز کے لیے ایک دوسرے کے مدمقابل ہوں گی۔