خلا میں بھی جنگ کی تیاریاں،سپر پاورز کی خفیہ فوجیں اور تباہ کن ہتھکنڈے سامنے آ گئے
لاہور(خصوصی رپورٹ:جانو ڈاٹ پی کے)زمین کے بعد اب خلا بھی سپر پاورز کے درمیان ایک ہولناک میدانِ جنگ میں تبدیل ہونے جا رہی ہے جہاں دنیا کے طاقتور ترین ممالک نے اپنی بقا اور برتری کے لیے خفیہ ترین خلائی فوجیں اور خطرناک وارفیئر سسٹم تیار کر لیے ہیں۔ اس وقت خلائی ٹیکنالوجی محض سیٹلائٹس اور سائنسی تحقیق تک محدود نہیں رہی بلکہ اب خلائی ہتھیار، سگنل جیمنگ سسٹمز اور لیزر ویپنز کے ذریعے دشمن کی معیشت اور مواصلاتی نظام کو سیکنڈوں میں مفلوج کرنے کی مکمل منصوبہ بندی کی جا چکی ہے۔ دنیا بھر کا انٹرنیٹ، بینکنگ سسٹم اور دفاعی جی پی ایس کا دارومدار جن سیٹلائٹس پر ہے، وہ اب براہِ راست دنیا کی بڑی طاقتوں کے نشانے پر ہیں۔ اگر خلا میں کوئی بھی تصادم ہوتا ہے تو دنیا بھر میں ایک سیکنڈ کے اندر اندھیرا چھا سکتا ہے اور جدید ترین دفاعی نظام زمین پر ہی ڈھیر ہو سکتے ہیں۔ خلائی تسلط کی اس دوڑ میں امریکہ، چین اور روس جیسے ممالک نے اپنے اپنے خلائی کمانڈز کو ہائی الرٹ کر رکھا ہے اور ایسے خفیہ اثاثے خلا میں بھیج دیے ہیں جو کسی بھی وقت دشمن کے سیٹلائٹ کو خلا میں ہی نیست و نابود کر سکتے ہیں۔
