پاکستان نے پہلے ٹی ٹوئنٹی میں ویسٹ انڈیز کو 14 رنز سے شکست دے دی
پاکستان نے پہلے بیٹنگ کرتے ہوئے مقررہ 20 اوورز میں 6 وکٹوں کے نقصان پر 178 رنز اسکور کیے۔
فلوریڈا (اسپورٹس ڈیسک): پاکستان نے تین میچوں پر مشتمل ٹی ٹوئنٹی سیریز کے پہلے میچ میں ویسٹ انڈیز کو سنسنی خیز مقابلے کے بعد 14 رنز سے شکست دے کر سیریز میں 0-1 کی برتری حاصل کرلی۔
میچ امریکی ریاست فلوریڈا کے شہر لاؤڈرہل میں کھیلا گیا، جہاں ویسٹ انڈین کپتان شائے ہوپ نے ٹاس جیت کر پہلے فیلڈنگ کا فیصلہ کیا۔ پاکستان نے پہلے بیٹنگ کرتے ہوئے مقررہ 20 اوورز میں 6 وکٹوں کے نقصان پر 178 رنز اسکور کیے۔
پاکستان کی جانب سے اوپنر صائم ایوب نے جارحانہ بلے بازی کرتے ہوئے 57 رنز بنائے، جب کہ فخر زمان نے 28، حسن نواز نے 24، فہیم اشرف نے 16 اور صاحبزادہ فرحان نے 14 رنز کی اننگز کھیلیں۔ کپتان سلمان علی آغا 11 اور محمد حارث 6 رنز کے ساتھ ناٹ آؤٹ رہے۔
ویسٹ انڈیز کی جانب سے شیمار جوزف نے شاندار بولنگ کا مظاہرہ کرتے ہوئے 3 وکٹیں حاصل کیں، جبکہ جیسن ہولڈر، عقیل حسین اور روماریو شیفرڈ نے ایک ایک کھلاڑی کو آؤٹ کیا۔
ہدف کے تعاقب میں ویسٹ انڈیز کی ٹیم مقررہ 20 اوورز میں 7 وکٹوں پر 164 رنز تک محدود رہی۔ پاکستان کی شاندار بولنگ نے ویسٹ انڈین بلے بازوں کو کھل کر کھیلنے کا موقع نہ دیا۔ محمد نواز نے عمدہ بولنگ کرتے ہوئے 3 کھلاڑیوں کو آؤٹ کیا، جب کہ صائم ایوب نے 2، اور شاہین آفریدی و صفیان مقیم نے ایک ایک وکٹ حاصل کی۔
پاکستان کی جانب سے میدان میں اترنے والے کھلاڑیوں میں صاحبزادہ فرحان، صائم ایوب، فخر زمان، محمد حارث (وکٹ کیپر)، سلمان علی آغا (کپتان)، حسن نواز، محمد نواز، فہیم اشرف، شاہین آفریدی، حارث رؤف اور صفیان مقیم شامل تھے۔
پاکستان کی اس فتح کے بعد سیریز میں دلچسپی بڑھ گئی ہے۔
