پنجاب پولیس کا جرائم پیشہ عناصر کے خلاف بڑا کریک ڈاؤن، ایک لاکھ 16 ہزار سے زائد اشتہاری گرفتار

لاہور(جانوڈاٹ پی کے) پنجاب پولیس نے سنگین جرائم میں مطلوب اشتہاری و عادی مجرمان اور عدالتی مفروروں کے خلاف کریک ڈاؤن مزید تیز کردیا۔ رواں سال لاہور سمیت صوبہ بھر میں کارروائیوں کے دوران ایک لاکھ 16 ہزار سے زائد اشتہاری مجرمان کو گرفتار کیا گیا ہے۔

ترجمان پنجاب پولیس کے مطابق گرفتار اشتہاری مجرمان میں اے کیٹگری کے 29 ہزار جبکہ بی کیٹگری کے 87 ہزار سے زائد ملزمان شامل ہیں۔

پولیس کے مطابق صوبہ بھر میں کارروائیوں کے دوران 35 ہزار 546 سے زائد عدالتی مفرور بھی گرفتار کیے گئے، جن میں اے کیٹگری کے 5 ہزار 254 اور بی کیٹگری کے 30 ہزار 292 عدالتی مفرور شامل ہیں۔

ترجمان پنجاب پولیس کا کہنا ہے کہ رواں سال 12 ہزار 865 عادی مجرمان بھی گرفتار کیے گئے، جن میں اے کیٹگری کے 4 ہزار 406 جبکہ بی کیٹگری کے 8 ہزار 459 عادی مجرمان شامل ہیں۔

لاہور میں پولیس کارروائیوں کے دوران 26 ہزار 868 اشتہاری مجرمان، 11 ہزار 229 عدالتی مفرور اور 5 ہزار 203 عادی مجرمان کو گرفتار کیا گیا۔

آئی جی پنجاب عبدالکریم نے اشتہاری و عادی مجرمان اور عدالتی مفروروں کی گرفتاری کیلئے مؤثر کارروائیاں کرنے والی پولیس ٹیموں کو شاباش دی۔

آئی جی پنجاب نے ہدایت کی کہ سنگین جرائم میں مطلوب اشتہاری و عادی مجرمان اور عدالتی مفروروں کی گرفتاری کیلئے کارروائیاں بلا تعطل جاری رکھی جائیں اور جرائم پیشہ عناصر کے خلاف قانون کے مطابق مؤثر اقدامات کیے جائیں۔