روس کا برطانیہ اور نیٹو کو سخت انتباہ، کیلینن گراڈ کی ناکہ بندی پر جوہری جواب کا عندیہ
ماسکو (جانو ڈاٹ پی کے) روس نے برطانیہ اور نیٹو کو خبردار کیا ہے کہ کیلینن گراڈ کے محاصرے یا روسی علاقے پر کسی بھی فوجی کارروائی کی صورت میں ماسکو اپنے تمام دستیاب ذرائع استعمال کرتے ہوئے جواب دے گا، جن میں جوہری ہتھیار بھی شامل ہیں۔
لندن میں روسی سفارتخانے نے ٹیلی گرام پر جاری بیان میں برطانوی میڈیا کی ان رپورٹس کا حوالہ دیا جن میں کیلینن گراڈ کی ممکنہ ناکہ بندی یا خطے پر روسی خودمختاری کو تسلیم نہ کرنے سے متعلق امکانات پر بحث کی گئی تھی۔
روسی سفارتخانے نے کہا کہ جو عناصر کیلینن گراڈ کی ناکہ بندی یا اس پر حملے کے منصوبوں کی حمایت کر رہے ہیں، انہیں اس کے نتائج کے بارے میں کسی غلط فہمی میں نہیں رہنا چاہیے۔ سفارتخانے کے مطابق برطانیہ یا نیٹو کی جانب سے روسی سرزمین کے خلاف کسی بھی فوجی کارروائی کا جواب روس کے پاس موجود تمام ذرائع سے دیا جائے گا، جن میں جوہری ہتھیار بھی شامل ہیں۔
بیان میں مزید کہا گیا کہ روس نیٹو یا یورپ کے ساتھ محاذ آرائی نہیں چاہتا اور نہ ہی ان پر حملہ کرنے کا ارادہ رکھتا ہے، تاہم اگر کوئی فریق ایسا تنازع شروع کرتا ہے تو اسے روس کے ممکنہ ردعمل کے بارے میں غلط فہمی نہیں ہونی چاہیے۔
کیلینن گراڈ کی جغرافیائی اہمیت
کیلینن گراڈ بحیرہ بالٹک کے کنارے واقع روس کا ایک ایکسکلیو ہے، جو روس کے مرکزی علاقے سے الگ ہے اور پولینڈ اور لتھوانیا کے درمیان واقع ہے۔ روسی سرزمین تک اس کی زمینی رسائی لتھوانیا کے علاقے سے گزرتی ہے۔گزشتہ ہفتے پیرس میں روسی سفارتخانے نے بھی نیٹو افواج کی جانب سے کیلینن گراڈ پر ممکنہ حملے یا خطے تک رسائی روکنے سے متعلق بیانات پر ردعمل دیتے ہوئے کہا تھا کہ روس اپنی سرزمین کے دفاع کے لیے دستیاب تمام ذرائع استعمال کرے گا۔روسی سفارتخانے کے مطابق اگر ایسے منصوبوں پر عملدرآمد کی کوشش کی گئی تو روس کا جوابی ردعمل ناگزیر اور انتہائی شدید ہوگا۔
