سعودی ولی عہد محمد بن سلمان سے متحدہ عرب امارات کے نائب صدر کی اہم ملاقات،خطے کی تازہ صورتحال زیرِ بحث

ریاض (جانو ڈاٹ پی کے)متحدہ عرب امارات کے نائب صدر، نائب وزیراعظم اور صدارتی عدالت کے چیئرمین شیخ منصور بن زاید آل نہیان نے سعودی دارالحکومت ریاض میں سعودی ولی عہد اور وزیراعظم شہزادہ محمد بن سلمان بن عبدالعزیز آل سعود سے ملاقات کی۔ملاقات میں دونوں رہنماؤں نے متحدہ عرب امارات اور سعودی عرب کے درمیان برادرانہ تعلقات اور باہمی دلچسپی کے امور پر تبادلہ خیال کیا، جبکہ خطے کی تازہ صورتحال اور اہم علاقائی پیش رفت بھی زیرِ بحث آئی۔ملاقات میں سعودی وزیر دفاع شہزادہ خالد بن سلمان بن عبدالعزیز آل سعود بھی موجود تھے۔شیخ منصور بن زاید کے ہمراہ متحدہ عرب امارات کے سپریم کونسل برائے قومی سلامتی کے سیکریٹری جنرل علی بن حماد الشمسی، نیشنل ایمرجنسی، کرائسز اینڈ ڈیزاسٹر مینجمنٹ اتھارٹی کے چیئرمین علی سعید مطر النیادی، توَازُن کونسل برائے دفاعی معاونت کے سیکریٹری جنرل ڈاکٹر ناصر حمید النعیمی سمیت دیگر اعلیٰ حکام بھی موجود تھے۔ملاقات کے بعد شیخ منصور بن زاید نے سعودی عرب کا اپنا برادرانہ دورہ مکمل کرکے وطن واپسی کے لیے روانگی اختیار کی۔