بابر اعظم کی ون ڈے جگہ پر سوالیہ نشان؟ شعیب اختر نے ٹیم مینجمنٹ کی سوچ بتا دی
پاکستان کے سابق فاسٹ بولر شعیب اختر نے قومی ون ڈے ٹیم میں بابر اعظم کی جگہ پر سوالات اٹھاتے ہوئے کہا ہے کہ ٹیم مینجمنٹ بھی انہیں اس فارمیٹ میں برقرار رکھنے کے حوالے سے غور کر رہی ہے۔ شعیب اختر کے بیان نے سہ ملکی سیریز سے قبل بابر اعظم کی کارکردگی اور ٹیم میں ان کے مستقبل سے متعلق بحث کو نئی تقویت دے دی ہے۔
ایک ٹی وی پروگرام میں گفتگو کرتے ہوئے شعیب اختر نے میزبان سے سوال کیا کہ کیا وہ بابر اعظم کو ون ڈے ٹیم میں منتخب کریں گے؟ ان کا کہنا تھا کہ ٹیم مینجمنٹ بھی اسی نوعیت کے سوالات پر غور کر رہی ہے۔ تاہم انہوں نے واضح کیا کہ وہ کسی تنازع کو جنم نہیں دینا چاہتے اور بابر اعظم کو کھیلنے کا موقع ملنا چاہیے، لیکن انہیں اپنی کارکردگی سے ثابت کرنا ہوگا کہ وہ ون ڈے کرکٹ کے لیے موزوں ہیں۔
شعیب اختر نے 50 اوورز کی کرکٹ میں عاقب جاوید کو درپیش چیلنجز کا بھی ذکر کیا۔ ان کے مطابق بیٹنگ اور بولنگ دونوں شعبوں میں ٹیم کی ذمہ داری نبھانا آسان نہیں ہوگا، تاہم انہوں نے امید ظاہر کی کہ ان کا اندازہ غلط ثابت ہو۔
بابر اعظم نے اپنی آخری ٹیسٹ سنچری دسمبر 2022 میں نیوزی لینڈ کے خلاف کراچی میں بنائی تھی، جب انہوں نے ناٹ آؤٹ 161 رنز اسکور کیے۔ ون ڈے کرکٹ میں ان کی آخری سنچری نومبر 2025 میں سری لنکا کے خلاف راولپنڈی میں سامنے آئی، جہاں انہوں نے ناٹ آؤٹ 102 رنز بنائے تھے۔ یہ ان کی ون ڈے انٹرنیشنل کرکٹ میں 20ویں سنچری تھی۔
پاکستان کرکٹ بورڈ نے انگلینڈ اور سری لنکا کے خلاف سہ ملکی ون ڈے سیریز کے لیے بابر اعظم کو اسکواڈ میں شامل کیا ہے۔ سیریز کا آغاز راولپنڈی میں پاکستان اور سری لنکا کے میچ سے ہونا ہے۔ دوسری جانب بابر اعظم کو رواں ماہ سری لنکا کے خلاف تین ٹی ٹوئنٹی میچوں کی سیریز کے لیے ٹیم میں شامل نہیں کیا گیا تھا۔
