ٹھٹھہ میں صحافیوں سے مبینہ ناروا سلوک کے خلاف ٹی یو جے ورکرز کا احتجاجی انتباہ

ٹھٹھہ (جاوید لطیف میمن\جانوڈاٹ پی کے) ٹھٹھہ یونین آف جرنلسٹس  نے ضلع میں دو صحافیوں کے ساتھ پیش آنے والے مبینہ واقعات پر شدید تشویش کا اظہار کرتے ہوئے متعلقہ حکام سے کارروائی کا مطالبہ کیا ہے۔

تنظیم کے مطابق گزشتہ روز ٹھٹھہ سے ملحقہ بگھاڑ موری روڈ پر زمین کے تنازعے کے دوران گاؤں عارب سولنگی کے رہائشیوں اور پولیس کے درمیان جھڑپیں ہوئیں۔ ٹی یو جے ورکرز کا مؤقف ہے کہ سینئر صحافی اور تعلیم دوست شخصیت حاجن سولنگی اس تنازعے میں شامل نہیں تھے، تاہم ان کے باوجود انہیں مبینہ طور پر مقدمے میں نامزد کیا گیا۔

تنظیم نے ایک اور واقعے کا حوالہ دیتے ہوئے دعویٰ کیا کہ ساحلی پٹی سے تعلق رکھنے والے صحافی منظور عارفانی کے ساتھ بگھان کے قریب بعض کسٹم اہلکاروں نے مبینہ طور پر بدتمیزی کی، ان کا موبائل فون چھیننے کی کوشش کی اور اسلحہ تان کر ہراساں کیا۔

ٹی یو جے ورکرز کے رہنماؤں نے ان واقعات کی مذمت کرتے ہوئے کہا کہ صحافیوں کے خلاف کارروائیاں اظہارِ رائے کی آزادی کے لیے تشویش کا باعث ہیں۔ انہوں نے مطالبہ کیا کہ حاجن سولنگی کے خلاف درج مقدمہ واپس لیا جائے اور منظور عارفانی کے ساتھ پیش آنے والے مبینہ واقعے کی شفاف تحقیقات کر کے ذمہ داروں کے خلاف قانونی کارروائی کی جائے۔

تنظیم نے خبردار کیا کہ اگر ان کے مطالبات پر عمل درآمد نہ کیا گیا تو وہ احتجاج کا راستہ اختیار کرے گی۔

نوٹ: یہ خبر ٹھٹھہ یونین آف جرنلسٹس (PFUJ Workers) کے بیان اور مؤقف پر مبنی ہے۔ پولیس اور کسٹم حکام کا مؤقف سامنے آنے پر خبر کو اس کے مطابق اپ ڈیٹ کیا جا سکتا ہے۔