بھگت ہرداس کے روحانی جانشین بھگت ماتورام کے انتقال پر تعزیت کا سلسلہ جاری
تھرپارکر (رپورٹ: مینڈھرو کاجھروی/جانو ڈاٹ پی کے) صوفی بزرگ بھگت ہرداس کے روحانی جانشین (گدی نشین) بھگت ماتورام کے انتقال پر تعزیت کا سلسلہ جاری ہے۔ سیاسی، سماجی اور مختلف برادریوں سے تعلق رکھنے والی اہم شخصیات مٹھی پہنچ کر سوگوار خاندان سے اظہارِ تعزیت کر رہی ہیں۔
مختلف شخصیات نے مرحوم کے صاحبزادوں سنیل بھگت اور ونیس بھگت، جبکہ ان کے بھانجے ایم این اے ڈاکٹر مہیش کمار ملانی سے ملاقات کی اور بھگت ماتورام کے انتقال پر گہرے دکھ اور افسوس کا اظہار کیا۔
تعزیت کے لیے آنے والی شخصیات میں بلوچستان سے ایم این اے درشن لال، سندھ سے ایم پی اے ڈاکٹر اشوک رتنانی، سندھ کے ایم پی اے فقیر شیر محمد بلالانی، وزیراعلیٰ سندھ کے معاونِ خصوصی راجا راج ویر سنگھ، جونیئر ارباب امیر حسن لطف اللہ، بیرسٹر ارباب فضل اللہ، کامریڈ ٹیک داس ہیرانی، کامریڈ چیتن لال، آتم صالحانی، ادریس لُنڈ، ہریش ہیرانی، ارشاد لُنڈ، نارائن بھیل، دانش گہلڑو اور دیگر شامل تھے۔
سول اسپتال مٹھی کے ڈاکٹروں کے ایک وفد نے بھی سوگوار خاندان سے ملاقات کی اور بھگت ماتورام کے انتقال پر تعزیت اور ہمدردی کا اظہار کیا۔
دریں اثناء ریڑھکی صاحب درگاہ کے روحانی جانشین سنت روہت لال نے بھی ٹیلی فون کے ذریعے سوگوار خاندان سے تعزیت کی اور اپنے گہرے دکھ اور ہمدردی کا اظہار کیا۔
بھگت ماتورام کے انتقال کے بعد مٹھی میں واقع ہرداس ہری دواری میں ہر رات باقاعدگی سے عقیدتی ست سنگ کی محافل بھی جاری ہیں، جہاں عقیدت مند اور پیروکار اجتماعی دعاؤں اور روحانی یاد میں شریک ہو رہے ہیں۔
تھرپارکر سمیت سندھ کے مختلف علاقوں سے لوگ، بھگت ہرداس اور بھگت ماتورام کے عقیدت مند اور پیروکار مٹھی پہنچ کر سوگوار خاندان سے تعزیت کر رہے ہیں اور مرحوم کو خراجِ عقیدت پیش کر رہے ہیں۔
