وینزویلا کو عدم استحکام کی طرف نہ دھکیلا جائے، صدر اردوان کا ٹرمپ کو دوٹوک پیغام

انقرہ(مانیٹرنگ ڈیسک)ترکیے کے صدر رجب طیب اردوان نے کہا ہے کہ انہوں نے امریکی صدر ڈونلڈ ٹرمپ سے ٹیلی فونک گفتگو کے دوران واضح طور پر مؤقف اختیار کیا ہے کہ وینزویلا کو صدر نکولس مادورو کی معزولی کے بعد عدم استحکام اور انتشار کی طرف نہیں دھکیلا جانا چاہیے۔

کابینہ اجلاس کے بعد میڈیا سے گفتگو کرتے ہوئے صدر اردوان نے کہا کہ ترکیے موجودہ نازک صورتحال میں وینزویلا کے عوام کے ساتھ کھڑا رہے گا اور ان کی حمایت جاری رکھے گا۔ ان کا کہنا تھا کہ ماضی میں صدر نکولس مادورو اور وینزویلا کے عوام نے ترک قوم کے ساتھ دوستی اور تعاون کا ثبوت دیا ہے۔

صدر اردوان نے خبردار کیا کہ ممالک کی خودمختاری، علاقائی سالمیت اور بین الاقوامی قوانین کی خلاف ورزی عالمی سطح پر سنگین مسائل اور عدم استحکام کو جنم دے سکتی ہے۔ انہوں نے اس بات پر زور دیا کہ اصولوں پر مبنی بین الاقوامی نظام کا تحفظ ناگزیر ہے اور تمام تنازعات کا حل طاقت کے استعمال کے بجائے مکالمے اور سفارتکاری کے ذریعے نکالا جانا چاہیے۔

ترکیے کے صدر نے کہا کہ عالمی برادری کو تحمل کا مظاہرہ کرنا ہوگا تاکہ خطے کو مزید بحرانوں سے بچایا جا سکے۔

واضح رہے کہ امریکی افواج نے ہفتے کے روز وینزویلا کے دارالحکومت کاراکاس میں کارروائی کرتے ہوئے صدر نکولس مادورو کو حراست میں لے کر امریکا منتقل کیا تھا، جہاں ان کے خلاف قانونی کارروائی جاری ہے۔

بعد ازاں صدر نکولس مادورو نے پیر کے روز نیویارک کی ایک عدالت میں منشیات اسمگلنگ کے الزامات کے تحت پیش ہو کر خود کو بے قصور قرار دیا ہے۔