نائیجیریا کی بندرگاہ پر بھارتی عملے کے 22 ارکان گرفتار، 31 کلو کوکین برآمد

ابوجا، نئی دہلی (مانیٹرنگ ڈیسک) نائیجیریا کی ڈرگ انفورسمنٹ ایجنسی نے لاگوس کی مرکزی بندرگاہ پر ایک تجارتی جہاز سے 31.5 کلوگرام کوکین برآمد کر کے جہاز کے 22 بھارتی عملے کے ارکان کو گرفتار کر لیا۔

بھارتی میڈیا کے مطابق گرفتار عملے میں جہاز کے ماسٹر شرما ششی بھوشن کے علاوہ دیگر 21 ارکان شامل ہیں، جن میں منوج کمار، بھالراو نیلیش مکند، نادر انتھونی میکسن ڈیوڈ، کولوسو سرینواس راؤ، ساگر گوراو، فرانسس اینٹو بیمس نیسٹر، جگدیپ سنگھ، جئے پرکاش، پربھوخان سنگھ، نیواج سندیش سُرش، پانڈے پرشانت، نِتو انند، آکاش بابو، داساری راجو، ریڈی نندیکا سنجیبا، رانا نیویش، میلیتھیل، انصاف رحمان، بارلا چندنیا کرشنا، گوش اریجیت اور موندل رَحان شامل ہیں۔

ذرائع کے مطابق ایم وی آروانا ہولیا جہاز مارشل آئی لینڈز سے روانہ ہوا تھا۔

ڈرگ انفورسمنٹ ایجنسی نے دسمبر 2025 میں بھی متعدد منشیات ضبط کی تھیں، جن میں 24 اور 29 دسمبر کو لاگوس کی ایک کورئیر کمپنی سے کیٹامین، ایکسٹسی اور ٹراماڈول کی گولیاں برآمد کی گئیں جو زیمبیا اور برطانیہ بھیجی جا رہی تھیں۔ نومبر میں ایجنسی نے 20 فلپائنی بحری عملے کو گرفتار کیا تھا جو برازیل سے کم از کم 20 کلو کوکین لا رہے تھے۔

اسی دوران نائیجیریا کی ایجنسی نے امریکی اور برطانوی انسداد منشیات ایجنسیوں کے ساتھ مل کر ایک منشیات کارٹل کی تحقیقات بھی کیں، جس کے تحت لاگوس کے بندرگاہ پر ایک کنٹینر میں 1,000 کلو کوکین برآمد ہوئی تھی۔