بھارت ،موٹر سائیکل سے ٹکر کے بعد بس میں آ تشزدگی ، 20 مسافر ہلاک،متعدد زخمی

نئی دہلی (مانیٹرنگ ڈیسک)بھارت میں موٹرسائیکل ٹکرانے کے بعد بس میں آگ بھڑک اٹھی جس کے نتیجے میں 20 مسافر ہلاک اور متعدد زخمی ہوگئے۔

بھارتی میڈیا کے مطابق یہ افسوسناک ٹریفک حادثہ ریاست آندھرا پردیش میں پیش آیا جہاں ایک موٹر سائیکل سے ٹکرانے کے بعد بس میں آگ لگ گئی جس کے نتیجے میں بس میں سوار 20 مسافر ہلاک ہوگئے۔رپورٹ کے مطابق بس ریاست کی ہائی وے پر سفر کررہی تھی اور حیدر آباد سے بینگلورو جارہی تھی۔

مقامی حکام نے بتایا کہ موٹر سائیکل سے ٹکرانے کے بعد بس موٹرسائیکل کو کچھ دور تک گھسیٹے ہوئے لے گئی اور اس دوران پٹرول لیک ہونے اور چنگاریوں سے آگ بھڑک اٹھی جو بس کے فیول ٹینک تک جاپہنچی، اس آگ نے پوری بس کو اپنی لپیٹ میں لے لیا جس کے باعث بڑے پیمانے پر جانی نقصان ہوا اور پوری بس جل کر خاکستر ہوگئی۔حکام کے مطابق بس میں سوار 41 مسافروں میں سے 21 کو زندہ بچا لیا گیا جن میں سے کچھ زخمیوں کی حالت تشویشناک ہے۔