رسول بخش دل کے قاتلوں کی گرفتاری کا مطالبہ، ستون میل میں احتجاجی مظاہرہ، دھرنا اور سخت احتجاج کی وارننگ
تھرپارکر: (رپورٹ: میندھرو کاجھروی/جانو ڈاٹ پی کے) رسول بخش دل کے قتل میں ملوث ملزمان کی گرفتاری کے مطالبے کے لیے دل برادری نے وڈیرو رضاءُ اللہ دل کی قیادت میں ستون میل شہر میں احتجاجی مظاہرہ اور دھرنا دیا، جس میں بڑی تعداد میں شہریوں نے شرکت کی۔
مظاہرین نے ہاتھوں میں پلے کارڈز اٹھا رکھے تھے اور قاتلوں کی فوری گرفتاری کے حق میں نعرے بازی کی۔ انہوں نے حکومت اور قانون نافذ کرنے والے اداروں سے مطالبہ کیا کہ رسول بخش دل کے قتل میں ملوث تمام ملزمان کو فوری گرفتار کرکے قانون کے مطابق سخت سزا دی جائے۔
اس موقع پر مقررین نے کہا کہ مقتول کے اہلِ خانہ کو فوری انصاف فراہم کیا جائے اور کسی بھی ملزم کو قانون کی گرفت سے بچنے کا موقع نہ دیا جائے۔ انہوں نے خبردار کیا کہ اگر قاتلوں کو جلد گرفتار نہ کیا گیا تو احتجاج کا دائرہ مزید وسیع کیا جائے گا۔
مظاہرین نے اعلان کیا کہ اگر ان کے جائز مطالبات منظور نہ کیے گئے تو آئندہ مرحلے میں مٹھی–تھرکول مین روڈ بلاک کرکے مزید سخت احتجاج کیا جائے گا۔
شرکاء نے مطالبہ کیا کہ واقعے کی شفاف تحقیقات مکمل کرتے ہوئے تمام ذمہ دار افراد کو بلا تاخیر قانون کے کٹہرے میں لایا جائے تاکہ متاثرہ خاندان کو انصاف مل سکے۔
