ڈیپلو: ریٹائرڈ پولیس اہلکار کو مبینہ تشدد کے بعد زنجیروں سے باندھنے کا انکشاف، تحقیقات کا مطالبہ

تھرپارکر(رپورٹ: میندھرو کاجھروی/جانو ڈاٹ پی کے) تعلقہ ڈیپلو کے گاؤں لسیو میں ایک ریٹائرڈ پولیس اہلکار ہرچند ولد تیجو میگھواڑ کو مبینہ طور پر بااثر افراد کی جانب سے تشدد کا نشانہ بنانے اور کئی گھنٹوں تک رسیوں اور زنجیروں سے باندھ کر رکھنے کا معاملہ سامنے آیا ہے۔

اطلاعات کے مطابق ہرچند میگھواڑ کو 30 تاریخ سے مبینہ طور پر تشدد کا نشانہ بنایا گیا، جس کے باعث وہ زخمی بھی ہوا۔ ذرائع کا کہنا ہے کہ متاثرہ شخص کو پہلے رسیوں اور زنجیروں سے باندھا گیا اور بعد ازاں اگلے روز صبح تقریباً 10 بجے جنگل کے علاقے میں ایک درخت کے ساتھ باندھ دیا گیا، جہاں وہ رات تک بندھا رہا۔

مقامی ذرائع کے مطابق معاملہ مالی لین دین اور زرعی زمین کے تنازعے سے جڑا ہوا بتایا جا رہا ہے۔ یہ بھی دعویٰ کیا جا رہا ہے کہ متاثرہ شخص کو ذہنی مریض قرار دینے کی کوشش کی جا رہی ہے۔

متاثرہ شخص کے داماد سنیل میگھواڑ نے ایس ایس پی تھرپارکر اور ایس ایچ او ڈیپلو سے مطالبہ کیا ہے کہ واقعے کا فوری نوٹس لے کر شفاف اور غیرجانبدارانہ انکوائری کرائی جائے اور متاثرہ شخص کو مبینہ ظلم و زیادتی سے تحفظ فراہم کیا جائے۔

پولیس یا دیگر متعلقہ حکام کی جانب سے اس واقعے کے حوالے سے تاحال کوئی باضابطہ مؤقف سامنے نہیں آیا ہے۔