مٹھی میں پانی کے ٹینکر کی ٹکر سے موٹر سائیکل سوار نوجوان جاں بحق
تھرپارکر(رپورٹ: میندھرو کاجھروی/جانو ڈاٹ پی کے) مٹھی بائی پاس پر پانی کے ٹینکر اور موٹر سائیکل کے درمیان خوفناک حادثہ پیش آیا، جس کے نتیجے میں موٹر سائیکل سوار نوجوان شدید زخمی ہوگیا۔ حادثے میں زخمی ہونے والے نوجوان کی شناخت دریودھن ولد کرمون مل میگھواڑ، رہائشی سگھروڑ محلہ، بائی پاس مٹھی کے طور پر ہوئی ہے۔ حادثے کے بعد زخمی شخص سڑک پر پڑا رہا، جبکہ موٹر سائیکل مکمل طور پر تباہ شدہ حالت میں موجود تھی اور قریب ہی پانی کا ٹینکر کھڑا تھا۔ اطلاع ملنے پر 1122 ریسکیو سروس نے زخمی کو اسپتال منتقل کیا، تاہم وہ زخموں کی تاب نہ لاتے ہوئے جاں بحق ہوگیا۔ مقامی ذرائع کے مطابق حادثے کے بعد ٹینکر کا ڈرائیور موقع سے غائب تھا۔ حادثے کے وقت سڑک سے گزرنے والے بعض افراد نے ویڈیو بھی بنائی۔ ابتدائی اطلاع کے دوران پولیس کے موقع پر نہ پہنچنے کے حوالے سے بھی سوالات اٹھائے گئے۔ حادثے کے حوالے سے مزید تحقیقات جاری ہیں۔
