تھرپارکر:گاؤں چونپنی سمیجا کا پرائمری اسکول خستہ حال، بچوں کی زندگیاں خطرے میں، فوری مرمت یا نئی عمارت کی اپیل

تھرپارکر (رپورٹ: میندھرو کاجھروی/جانو ڈاٹ پی کے) تحصیل مٹھی کے گاؤں چونپنی سمیجا کے رہائشیوں نے سندھ کے وزیرِ تعلیم سردار شاہ، وزیرِ اعلیٰ سندھ سید مراد علی شاہ اور ایم پی اے ارباب لطف اللہ سے اپیل کرتے ہوئے مطالبہ کیا ہے کہ گورنمنٹ پرائمری اسکول (ملاں پاڑا چونپنی سمیجا) کی خستہ حال عمارت کی فوری مرمت کرائی جائے یا نئی عمارت کی تعمیر کی منظوری دی جائے۔ رہائشیوں کی جانب سے دی گئی درخواست میں کہا گیا ہے کہ اسکول کی عمارت انتہائی خستہ حال ہو چکی ہے۔ عمارت کے سامنے لگی ٹائلیں، سیمنٹ کے چھجے اور چھت کے مختلف حصے ٹوٹ پھوٹ کا شکار ہیں، جس کے باعث اسکول میں زیرِ تعلیم معصوم بچوں اور اساتذہ کی جان کو ہر وقت خطرہ لاحق رہتا ہے۔ درخواست میں خدشہ ظاہر کیا گیا ہے کہ اگر بروقت اقدامات نہ کیے گئے تو کسی بھی وقت کوئی بڑا حادثہ پیش آ سکتا ہے۔ درخواست گزاروں نے متعلقہ حکام سے مطالبہ کیا ہے کہ اسکول کی عمارت کا فوری معائنہ کروا کر اس کی مرمت یا نئی عمارت کی تعمیر کے لیے ضروری اقدامات کیے جائیں، تاکہ طلبہ محفوظ، بہتر اور سازگار ماحول میں اپنی تعلیم جاری رکھ سکیں۔ گاؤں چونپنی سمیجا کے رہائشیوں نے امید ظاہر کی ہے کہ سندھ حکومت ان کے جائز مطالبے پر فوری توجہ دیتے ہوئے اسکول کے مسئلے کے حل کے لیے جلد عملی اقدامات کرے گی۔