سرکاری کھائی سے گھاس کاٹنے پر معمر شخص پر مبینہ تشدد، خواتین اور بچوں کا احتجاج

ٹنڈوباگو(جانوڈاٹ پی کے) شہر کے وارڈ نمبر 2 میر محلہ میں سرکاری کھائی سے گھاس کاٹنے پر معمر شخص کو مبینہ طور پر تشدد کا نشانہ بنانے کے خلاف متاثرہ خاندان نے ٹنڈوباگو پریس کلب کے سامنے احتجاجی مظاہرہ کیا۔

احتجاج میں زخمی الہڈنو خاصخیلی کی اہلیہ مسمات دادو، بیٹیوں نورجہاں، حمیدہ، فائزہ اور رحیمہ سمیت دیگر خواتین اور معصوم بچے شریک ہوئے۔

زخمی الہڈنو خاصخیلی اور اس کی اہلیہ نے صحافیوں کو بتایا کہ وہ انتہائی غریب خاندان سے تعلق رکھتے ہیں، جبکہ معمر الہڈنو گھاس کاٹ کر فروخت کرتا ہے اور اسی آمدن سے گھر کے لیے آٹا خرید کر بچوں کا پیٹ پالتا ہے۔

متاثرین کے مطابق گزشتہ روز الہڈنو سرکاری کھائی سے گھاس کاٹ رہا تھا کہ بابو خاصخیلی اور اس کے دو بیٹوں نے مبینہ طور پر لاٹھیوں سے حملہ کرکے اسے شدید تشدد کا نشانہ بنایا، جس سے وہ زخمی ہوگیا۔

متاثرہ خاندان کا الزام ہے کہ واقعے کی شکایت لے کر ٹنڈوباگو تھانے پہنچنے کے باوجود پولیس کی جانب سے مبینہ طور پر ملزمان کو گرفتار نہیں کیا جا رہا۔

متاثرین نے اعلیٰ پولیس حکام سے مطالبہ کیا کہ واقعے کا فوری نوٹس لے کر ملزمان کے خلاف قانون کے مطابق کارروائی کی جائے اور غریب خاندان کو تحفظ اور انصاف فراہم کیا جائے۔

اہلخانہ نے آئی جی سندھ، ڈی آئی جی حیدرآباد اور ایس ایس پی بدین سے اپیل کی کہ واقعے کی شفاف تحقیقات کروا کر انہیں انصاف دلایا جائے۔