سموکڈ ماش دال پاتی
پاتی (Pâté) روایتی طور پر ایک فرانسیسی (French) ڈش ہے، جسے عام طور پر گوشت، کلیجی یا سبزیوں کو باریک پیس کر اور مکھن یا جڑی بوٹیوں کے ساتھ ملا کر ایک کریمی اور ہوموجینیس پیسٹ کی شکل میں تیار کیا جاتا ہے۔ یہ فرانسیسی کھانوں میں ایک کلاسک ‘ایپیٹائزر’ یا اسپرڈ کے طور پر بہت مقبول ہے۔
وقت کے ساتھ ساتھ جب دنیا بھر میں فیوژن کوکنگ (Fusion Cooking) اور پلانٹ بیسڈ یا دالوں پر مبنی پروٹین کا رجحان بڑھا، تو شیفس نے روایتی دالوں خصوصاً ماش دال (Urad Dal) کو اس انداز میں ڈھالنا شروع کیا۔ ماش دال کی اپنی قدرتی لیس دار اور کریمی ساخت اس مقصد کے لیے بہترین ثابت ہوئی۔ جب اس میں کلاسک کانٹینینٹل ڈریسنگ کے ساتھ کوئلے کا اسموک (Smoked Flavor) دیا جاتا ہے، تو یہ مشرق اور مغرب کا ایک ایسا امتزاج بن جاتا ہے جو دیکھنے میں جتنا شاندار ہے، ذ ذائقے میں اتنا ہی لاجواب۔ اسے عام طور پر پارٹیوں میں کریکرز، ٹوسٹ یا بریڈ اسٹکس کے ساتھ پیش کیا جاتا ہے۔یہ عرب ڈش ہمس سے ملتی جلتی ہے جسے چنوں سے بنایا جاتا ہے۔
اجزاء (Ingredients)
ماش دال: 1 کپ (اچ اچھی طرح دھلی ہوئی اور بھیگی ہوئی)
زیتون کا تیل (Olive Oil): 3 سے 4 کھانے کے چمچ
لہسن کے جوے: 3 سے 4 عدد
لیموں کا رس: 2 کھانے کے چمچ
تہینی سوس (Tahini Sauce): 2 کھانے کے چمچ (تل کا پیسٹ، اگر نہ ہو تو سفید تل کو پیس کر شامل کیا جا سکتا ہے)
کالی مرچ پاؤڈر: آدھا چائے کا چمچ
زیرہ پاؤڈر: آدھا چائے کا چمچ
نمک: حسبِ ذائقہ
کوئلہ: 1 چھوٹا ٹکڑا (اسموک یا کوئلے کی دھونی دینے کے لیے)
گارنش کے لیے: زیتون کا تیل، باریک کٹا ہوا ہرا دھنیا یا پارسلے، اور چند دانے بھونے ہوئے تل۔
بنانے کا طریقہ ؛
بھیگی ہوئی ماش دال کو پانی اور تھوڑا سا نمک ڈال کر اتنا ابالیں کہ دال بالکل نرم ہو جائے اور گل جائے۔ ابالنے کے بعد اضافی پانی نال لیں (دال کو بالکل خشک نہیں کرنا، ہلکی سی نمی رہنے دیں تاکہ پیسٹ کریمی بنے)۔
ابلی ہوئی گرم دال کو فوڈ پروسیسر یا بلینڈر میں ڈالیں۔ اس میں زیتون کا تیل، لہسن، لیموں کا رس، تہینی، زیرہ پاؤڈر، کالی مرچ اور نمک شامل کریں۔
ان تمام چیزوں کو اچھی طرح تب تک بلینڈ کریں جب تک یہ بالکل ہموار (Smooth) اور ملائم پیسٹ نہ بن جائے۔ اگر مکسچر بہت زیادہ گاڑھا محسوس ہو تو 1-2 کھانے کے چمچ زیتون کا تیل یا پانی مزید ملا لیں۔
تیار شدہ پاتی کو ایک خوبصورت باؤل میں نکالیں۔ باؤل کے درمیان میں ایک چھوٹی ایلومینیم فوئل کی کٹوری یا پیاز کا چھلکا رکھیں، اور اس پر دہکتا ہوا کوئلہ رکھیں۔ کوئلے پر چند قطرے زیتون یا گھی کے ڈال کر فوری طور پر باؤل کو کسی ڈھکن سے بند کر دیں تاکہ دھواں باہر نہ نکلے۔ اسے 3 سے 5 منٹ کے لیے بند رہنے دیں تاکہ دال میں بہترین باربی کیو یا اسموکی فلیور رچ بس جائے۔
ڈھکن ہٹا کر کوئلہ باہر نکال دیں۔ پاتی کے اوپر زیتون کے تیل کی ایک ہلکی سی لکیر لگائیں، اور اوپر سے باریک کٹا ہوا ہرا دھنیا یا سفید تل چھڑک دیں۔
اسے گرم گرم روسٹ کیے ہوئے بریڈ سلائسز، فرینچ بیگیٹ (Baguette) سلائسز، یا کانٹینینٹل کریکرز کے ساتھ بطور اسپرڈ پیش کریں۔
