اسرائیل میں ہینٹا وائرس کا پہلا کیس رپورٹ

تل ابیب(جانوڈاٹ پی کے)اسرائیل میں ہینٹا وائرس کے پہلے کیس کی تصدیق ہوگئی ، یہ مریض مشرقی یورپ کے دورے کے دوران وائرس کا شکار ہوا تھا۔

تفصیلات کے مطابق ہینٹا وائرس دنیا کے مزید ممالک تک پہنچنا شروع ہو گیا ہے، جس کے نتیجے میں متاثرہ ممالک کی فہرست طویل ہوتی جا رہی ہے۔

تازہ ترین اطلاعات کے مطابق اسرائیل میں وائرس کے پہلے کیس کی تصدیق ہوئی ہے جبکہ ایک سیاحتی بحری جہاز پر شروع ہونے والے آؤٹ بریک نے تشویش میں اضافہ کر دیا ہے۔

اسرائیلی وزارتِ صحت نے ملک میں ہینٹا وائرس کے پہلے کیس کی تصدیق کرتے ہوئے کہا متاثرہ شخص مستحکم حالت میں ہے اور طبی نگرانی میں ہے، یہ مریض مشرقی یورپ کے دورے کے دوران وائرس کا شکار ہوا تھا۔

اسرائیل میں پایا جانے والا یہ وائرس "یورپی اسٹرین” ہے، جو کہ کروز شپ پر پھیلے ہوئے خطرناک "اینڈیز اسٹرین” سے مختلف ہے۔

سیاحتی بحری جہاز ‘ایم وی ہونڈیئس’ پر ہینٹا وائرس کا پھیلاؤ سنگین صورتحال اختیار کر گیا ہے۔ 8 مئی 2026 تک کی رپورٹ کے مطابق اب تک مختلف ممالک میں مجموعی طور پر 6 کنفرم اور 9 مشتبہ کیسز سامنے آ چکے ہیں اور اس وباء کے نتیجے میں اب تک 3 اموات ریکارڈ کی جا چکی ہیں۔

اس جہاز پر پھیلا ہوا "اینڈیز وائرس” زیادہ خطرناک سمجھا جاتا ہے کیونکہ اس میں انسان سے انسان میں منتقل ہونے کی محدود صلاحیت موجود ہے۔

عالمی ادارہ صحت نے صورتحال کا جائزہ لینے کے بعد عوام کو اطمینان دلایا ہے کہ عالمی سطح پر صحتِ عامہ کے لیے خطرے کی سطح فی الحال "کم” (Low) رکھی گئی ہے۔

انتقالِ وائرس: ماہرین کے مطابق اینڈیز وائرس صرف قریبی اور طویل مدتی رابطے سے پھیلتا ہے، عام سماجی میل جول سے اس کے پھیلاؤ کا خطرہ نہیں ہے۔