صدر کا ملک میں لوڈ شیڈنگ کیخلاف نوٹس،پانی کو بطورہتھیار استعمال کرنے پر بھارت پر تنقید

اسلام آباد(جانوڈاٹ پی کے)صدرِ مملکت آصف علی زرداری نے ایوانِ صدر میں آبی وسائل کے انتظام سے متعلق اہم اجلاس کی صدارت کی، جس میں ملک میں پانی کی دستیابی، انتظامی امور اور علاقائی صورتحال کے پانی کی سلامتی پر اثرات کا جائزہ لیا گیا۔

صدر آصف علی زرداری نے اجلاس میں بھارت کی جانب سے انڈس واٹرز ٹریٹی کی معطلی کو پانی کے “بطور ہتھیار استعمال” کرنے کی کوشش قرار دیتے ہوئے اس پر گہری تشویش کا اظہار کیا۔ انہوں نے کہا کہ پاکستان کے آبی حقوق کا تحفظ انتہائی اہم ہے اور اس سلسلے میں تمام ضروری سفارتی اور قانونی اقدامات کیے جائیں گے۔

توانائی کی کمی اور لوڈشیڈنگ کے معاملے پر گفتگو کرتے ہوئے صدر نے ہدایت کی کہ ملک بھر میں لوڈشیڈنگ میں کمی کے لیے ہر ممکن اقدامات کیے جائیں۔ انہوں نے زور دیا کہ لوڈ مینجمنٹ کو مکمل طور پر شفاف اور پہلے سے اعلان کردہ شیڈول کے مطابق کیا جائے تاکہ عوام کو بروقت آگاہی مل سکے اور مشکلات کم ہوں۔

صدر مملکت نے پانی کے تحفظ کے اقدامات کو تیز کرنے پر بھی زور دیا اور کہا کہ بارش کے پانی کو محفوظ کرنے کے منصوبے گھریلو، تجارتی اور صنعتی سطح پر فوری طور پر نافذ کیے جائیں۔ انہوں نے چھوٹے ڈیموں، ری چارج ویلز اور پانی ذخیرہ کرنے کے انفراسٹرکچر کی تیز رفتار تعمیر کی ہدایت بھی کی۔

اجلاس میں علاقائی صورتحال پر بھی غور کیا گیا۔ صدر نے کہا کہ خطے میں استحکام ناگزیر ہے اور پاکستان کی تعمیری سفارت کاری کے ذریعے ایران سے متعلق صورتحال میں قابلِ عمل راستہ نکلنے کی امید ہے۔

اجلاس میں وفاقی وزراء برائے آبی وسائل، منصوبہ بندی، توانائی، وزیراعظم کے مشیر برائے سیاسی و عوامی امور، سینیٹرز اور متعلقہ اعلیٰ حکام نے شرکت کی۔