لندن میں ایرانی سفارتخانےکے باہر احتجاجی مظاہرہ،6 افرادگرفتار

لندن(جانوڈاٹ پی کے)لندن میں  ایرانی سفارت  خانے کے باہر  احتجاج کرنے  والے 6  افراد کو گرفتار کرلیا گیا۔

پولیس کے مطابق گرفتار افراد کے خلاف پرتشدد ہنگامہ آرائی، ایمرجنسی اہلکار پر حملہ، سرکاری و نجی املاک کو نقصان پہنچانے اور سفارتی احاطے میں غیر قانونی داخلے کے الزامات کے تحت مقدمات درج کیے گئے ہیں۔

سفارتخانے کی چھت پر لگے ایرانی پرچم کو اتارنے والے ایک شخص کو بھی گرفتار کیا گیا جس کے خلاف مجرمانہ نقصان پہنچانے کے الزام میں مقدمہ درج کرلیا گیا۔

پولیس کے مطابق  احتجاج کے دوران پولیس پر مختلف اشیاء پھینکی گئیں جس سے 4 اہلکاروں کو  معمولی چوٹیں آئیں۔

پولیس کا کہنا ہے کہ مظاہرین کی جانب سے  سفارتخانے سے ایرانی پرچم کو اتارنے والے شخص کی  گرفتاری میں رکاوٹ  ڈالنےکی کوشش بھی کی گئی جس کے بعد افسران نے صورتحال کو قابو میں رکھنے اور مزید بےامنی کو روکنے کے لیے سفارت خانے کے باہر سیکشن 35 کے تحت منتشر  ہونے کا حکم نافذ کیا۔