ودہولڈنگ ٹیکس غیر شرعی،انسانی دودھ کا بینک قائم ہو سکتا ہے،اسلامی نظریاتی کونسل کا دلچسپ فیصلہ

اسلامی نظریاتی کونسل نے  ودہولڈنگ ٹیکس کو غیر شرعی قرار دیدیا۔

چیئرمین اسلامی نظریاتی کونسل علامہ ڈاکٹر راغب نعیمی کی زیر صدارت اجلاس میں کونسل نے سپریم کورٹ کے11ستمبر کے فیصلے پربھی تحفظات کا اظہار کیا جس میں نکاح کے بعد رخصتی سے قبل طلاق کی صورت میں نان نفقہ کی ادائیگی لازم قرار دی گئی تھی۔ کونسل کے مطابق یہ فیصلہ قرآن و سنت کے خلاف ہے۔

انسانی دودھ کا بینک مشروط

انسانی دودھ ذخیرہ کرنے کے اداروں کے قیام کے حوالے سے کونسل نے کہا کہ مخصوص شرائط کے تحت یہ ادارے قائم کیے جا سکتے ہیں لیکن قبل لازمی قانون سازی کی جائے اور اس عمل میں کونسل کو شامل کیا جائے۔

کونسل نے دیت کے قانون میں مجوزہ ترامیم کی بھی مخالفت کرتے ہوئے کہا کہ دیت کے قانون میں ترمیم کیلئے پیش کردہ بل سےاتفاق نہیں کرتے،بل میں چاندی کو حذف کرنے اور سونے کی غیر شرعی مقدار کو معیار بنایا گیا ہے۔

اسلامی نظریاتی کونسل نے دیت کے مجوزہ قانون کی مخالفت کردی

کونسل نے کہا کہ دیت کی سونا، چاندی اور اونٹ سے متعلق شرعی مقداریں قانون کا حصہ رہنی چاہئیں۔اسلامی نظریاتی کونسل نے شوگر کے مریضوں کے لیے حلال اجزا سے تیار شدہ انسولین کے استعمال کی اجازت دی، تاہم خنزیر کے اجزا پر مشتمل انسولین سے پرہیز کرنے کی ہدایت کی اور اس حوالے سے بھی مناسب قانون سازی پر زور دیا۔