لبنان کے کئی قصبوں پر اسرائیلی حملے، مکانات تباہ

بیروت (جانو ڈاٹ پی کے)جنوبی لبنان میں اسرائیلی فضائی حملوں کا سلسلہ جاری ہے، جن میں طائر، نبطیہ، مرجعیون اور بنت جبیل کے علاقوں میں متعدد قصبوں اور دیہات کو نشانہ بنایا گیا ہے۔

لبنان کی سرکاری خبر رساں ایجنسی این این اے کے مطابق اسرائیلی حملوں اور کارروائیوں کی زد میں منصوری، وادی زبقین، نبطیہ الفوقا، کفرتبنیت، میفدون، کفر رمان، مزرعۃ الشومیریہ، القصیر، بیت یاحون، صفارین اور حداثہ سمیت متعدد علاقے آئے۔

رپورٹ کے مطابق طائر کے ضلع میں واقع منصوری میں اسرائیلی فورسز نے کئی مکانات منہدم کیے، جبکہ وادی زبقین پر توپ خانے سے گولہ باری کی گئی اور اس دوران بھاری مشین گنوں سے بھی فائرنگ کی گئی۔

نبطیہ میں بھی اسرائیلی جنگی طیاروں نے رات گئے متعدد فضائی حملے کیے۔ نبطیہ الفوقا کو دو مرتبہ نشانہ بنایا گیا، جبکہ کفرتبنیت کے مضافات اور میفدون پر بھی حملے کیے گئے۔

این این اے کے مطابق میفدون میں ہونے والے ایک فضائی حملے کے نتیجے میں ایک مکان مکمل طور پر تباہ ہوگیا۔

جنوبی لبنان میں جاری اسرائیلی کارروائیوں کے باعث متاثرہ علاقوں میں کشیدگی برقرار ہے، جبکہ حملوں سے ہونے والے جانی و مالی نقصان سے متعلق مزید تفصیلات سامنے آنے کا انتظار ہے۔