پی ٹی آئی لانگ مارچ کی نئی تاریخ آگئی،4اکتوبر کو پشاور سے روانگی کا اعلان

پشاور (جانو ڈاٹ پی کے) وزیراعلیٰ خیبرپختونخوا سہیل آفریدی نے کہا ہے کہ پی ٹی آئی کی سیاسی کمیٹی نے مشاورت کے بعد فیصلہ کیا ہے کہ لانگ مارچ 4 اکتوبر کو پشاور سے روانہ ہوگا۔میڈیا سے گفتگو کرتے ہوئے سہیل آفریدی کا کہنا تھا کہ سیاسی کمیٹی کے اجلاس میں تمام معاملات پر تفصیلی مشاورت کی گئی اور کمیٹی نے اتفاق رائے سے 4 اکتوبر کو پشاور سے مارچ شروع کرنے کا فیصلہ کیا ہے۔انہوں نے کہا کہ ان کی جماعت کی جدوجہد آئین کی بحالی کے لیے ہے اور اگر کسی کی بات نہ سنی جائے تو اسے پرامن احتجاج کا آئینی حق حاصل ہے۔وزیراعلیٰ خیبرپختونخوا نے وفاقی حکومت اور سیاسی مخالفین پر مختلف الزامات بھی عائد کیے اور کہا کہ ماضی میں ڈان لیکس اور عدلیہ سے متعلق واقعات پیش آئے۔ انہوں نے مریم نواز سے منسوب ایک بیان کا حوالہ دیتے ہوئے بھی تنقید کی اور الزام عائد کیا کہ بعض اقدامات کا مقصد ملک کو تقسیم کرنا ہے۔سہیل آفریدی نے ایک وفاقی وزیر کے حوالے سے بھی اعتراضات اٹھائے اور کہا کہ انہیں سیاسی گفتگو میں مناسب زبان استعمال کرنی چاہیے۔واضح رہے کہ پی ٹی آئی نے اس سے قبل 27 ستمبر کو اسلام آباد کی جانب لانگ مارچ کا اعلان کیا تھا، تاہم تازہ فیصلے کے مطابق سیاسی کمیٹی نے مارچ کو 4 اکتوبر تک مؤخر کرنے پر اتفاق کیا ہے۔پی ٹی آئی قیادت کی جانب سے لانگ مارچ کو پرامن رکھنے اور اسے آئینی و جمہوری جدوجہد کے طور پر جاری رکھنے کے بیانات بھی سامنے آتے رہے ہیں