دنیا کا حیرت انگیز طیارہ، جس نے سب کو چونکا دیا

واشنگٹن(ویب ڈیسک) امریکی اسٹارٹ اپ کمپنی جیٹ زیرو ایک جدید مسافر طیارہ تیار کر رہی ہے، جس کا ڈیزائن روایتی ہوائی جہازوں سے بالکل مختلف ہوگا۔ زیڈ4 نامی اس طیارے میں 250 مسافروں کے بیٹھنے کی گنجائش ہوگی، جبکہ یہ ایک مرتبہ میں تقریباً 5 ہزار میل تک پرواز کر سکے گا۔

ریاست کیلیفورنیا میں قائم کمپنی جیٹ زیرو نے اس جدید طیارے کی پہلی آزمائشی پرواز 2027 میں کرنے کا منصوبہ بنایا ہے۔ کمپنی اس منفرد ڈیزائن کے ذریعے بوئنگ جیسے بڑے طیارہ ساز اداروں کے مقابلے میں اپنی جگہ بنانے کی تیاری کر رہی ہے۔

زیڈ4 طیارے کی سب سے نمایاں خصوصیت اس کا ’’بلینڈڈ وِنگ باڈی‘‘ ڈیزائن ہے، جس میں طیارے کے مرکزی جسم اور پروں کو الگ الگ رکھنے کے بجائے ایک ہموار ساخت میں ضم کیا گیا ہے۔ اس کی مجموعی شکل سمندر میں پائی جانے والی اسٹنگ رے مچھلی سے مشابہت رکھتی ہے۔

کمپنی کے مطابق زیڈ4 کی ساخت روایتی مسافر طیاروں، بشمول بوئنگ 767، کے مقابلے میں زیادہ چوڑی اور نسبتاً کم اونچائی والی ہوگی۔ طیارے کے اندرونی حصے کو بھی مختلف انداز میں ترتیب دینے کا منصوبہ ہے، جس میں مسافروں کے لیے نسبتاً کشادہ نشستیں فراہم کی جائیں گی۔

اس جدید طیارے کی ایک اور غیر معمولی خصوصیت یہ ہے کہ اس میں روایتی طرز کی کھڑکیاں نہیں ہوں گی۔ اس کے ڈیزائن اور اندرونی ساخت کو مستقبل کے فضائی سفر کے تقاضوں کے مطابق تیار کیا جا رہا ہے۔

فضائی صنعت میں جیٹ زیرو کے اس منصوبے کو مسافر طیاروں کے روایتی ڈیزائن سے ہٹ کر ایک نئی کوشش قرار دیا جا رہا ہے۔ تاہم طیارے کی حقیقی کارکردگی، پرواز کی صلاحیت اور عملی افادیت کا اندازہ اس کی آزمائشی پروازوں اور تکنیکی مراحل کی تکمیل کے بعد ہی لگایا جا سکے گا۔