بے نظیر انکم سپورٹ اور ممتا پروگرام: کلوئی میں خواتین کا رش، بے ہوشی کے واقعات، اسپتال میں غیر قانونی سینٹر قائم
تھرپارکر(رپورٹ: میندھرو کاجھروی/جانو ڈاٹ پی کے) کلوئی شہر میں بے نظیر انکم سپورٹ پروگرام کے کارڈز کے لیے سموں کے حصول اور ممتا پروگرام کی رجسٹریشن کے سلسلے میں خواتین کی بڑی تعداد جمع ہو گئی، جہاں انتظامی نااہلی کے باعث خواتین کو شدید مشکلات کا سامنا کرنا پڑا۔ یونین کونسل کلوئی کے دفتر کے باہر بے نظیر انکم سپورٹ پروگرام سے مستفید ہونے والی خواتین کا بڑا ہجوم موجود تھا، جبکہ سول اسپتال کلوئی میں ممتا پروگرام کے لیے بھی سینکڑوں خواتین کھلے میدان میں شدید گرمی کے باوجود گھنٹوں انتظار کرنے پر مجبور رہیں۔ مقامی افراد کے مطابق دونوں مقامات پر نہ تو پینے کے صاف پانی کا مناسب انتظام کیا گیا اور نہ ہی خواتین کے لیے بیٹھنے یا سایہ فراہم کرنے کا بندوبست تھا، جس کے باعث سخت گرمی میں متعدد خواتین کی طبیعت خراب ہو گئی جبکہ بعض بے ہوش بھی ہو گئیں۔ حیرت انگیز امر یہ ہے کہ صرف خواتین سے متعلق ان پروگراموں کے دوران رش والے مقامات پر بڑی تعداد میں مرد بھی موجود تھے، جبکہ نظم و ضبط برقرار رکھنے کے لیے انتظامیہ یا قانون نافذ کرنے والے اداروں کی مؤثر موجودگی نظر نہیں آئی۔ ذرائع کے مطابق سول اسپتال کلوئی میں ممتا پروگرام کے لیے قائم رجسٹریشن سینٹر قانونی تقاضے پورے کیے بغیر چلایا جا رہا ہے، جس پر شہریوں نے تشویش کا اظہار کیا ہے۔ شہریوں اور سماجی حلقوں نے انتظامیہ کی کارکردگی پر سخت سوالات اٹھاتے ہوئے مطالبہ کیا ہے کہ خواتین کی عزت، تحفظ اور بنیادی سہولیات کو یقینی بنانے کے لیے فوری اقدامات کیے جائیں۔ ان کا کہنا ہے کہ کلوئی میں بڑھتی ہوئی بدانتظامی اور لا قانونیت کے باعث معزز خاندانوں کی خواتین اور عام شہری شدید پریشانی کا شکار ہیں، لہٰذا متعلقہ حکام فوری نوٹس لے کر بہتر انتظامی اقدامات کریں۔
