سندھ کی وحدت پر کوئی سمجھوتا نہیں، 15 نومبر کو کراچی میں بڑا مارچ ہوگا، قادر مگسی

ٹھٹھہ (جانو ڈاٹ پی کے)سندھ ترقی پسند پارٹی کے چیئرمین ڈاکٹر قادر مگسی نے سندھ کی وحدت کے تحفظ کے لیے رابطہ مہم کا آغاز اپنی جنم بھومی ٹھٹھہ سے کرتے ہوئے 15 نومبر کو کراچی میں مارچ اور بڑے عوامی اجتماع کا اعلان کردیا۔

ٹھٹھہ پریس کلب کے سامنے منعقدہ جلسے سے خطاب کرتے ہوئے ڈاکٹر قادر مگسی نے کہا کہ سندھ ہزاروں سال کی تاریخ رکھنے والی دھرتی ہے اور سندھ کی وحدت کے تحفظ کے لیے عوام کسی بھی صورت پیچھے نہیں ہٹیں گے۔

انہوں نے کہا کہ "سندھ کے لوگ اپنا سر دے دیں گے لیکن دھرتی ماں کی حفاظت کے لیے ایک قدم بھی پیچھے نہیں ہٹیں گے۔”

ڈاکٹر قادر مگسی نے کہا کہ سندھ کو تقسیم کرنے کے خواب دیکھنے والے عناصر کو عوام کی مزاحمت کا سامنا کرنا پڑے گا۔ ان کے مطابق سندھ کے عوام اپنی سرزمین کی وحدت کے تحفظ کے لیے متحد ہیں۔

انہوں نے کہا کہ سندھ کی مزاحمت کی تاریخ کو نظرانداز نہیں کیا جاسکتا اور اب سندھ کے عوام کو سندھ کی وحدت کے تحفظ کی جدوجہد کے لیے متحرک کیا جارہا ہے۔ ان کا کہنا تھا کہ 15 نومبر کو کراچی میں سندھ بھر سے عوام جمع ہوں گے۔

ایس ٹی پی سربراہ نے کہا کہ ان کی جماعت سندھ کی وحدت کی بقا کے لیے عوامی رابطہ مہم شروع کر رہی ہے، جس کے دوران مختلف علاقوں میں اجتماعات اور رابطے کیے جائیں گے۔ حالیہ رپورٹ کے مطابق یہ مہم 20 ستمبر کو ٹھٹھہ سے شروع کی گئی اور 15 نومبر کو کراچی کے باغِ جناح میں عوامی اجتماع پر ختم ہوگی۔

جلسے سے مولانا ایاز قمی، ایس ٹی پی کے مرکزی رہنماؤں ہوت خان گاڈھی، نثار کیریو، گلزار سومرو، ڈاکٹر حمید میمن، ڈاکٹر احمد نوناری، غلام علی مگسی، امتیاز سمون، خدابخش درس اور سندھ ترقی پسند ناری تحریک کی مرکزی رہنما سعیدہ گوپانگ سمیت دیگر رہنماؤں نے بھی خطاب کیا۔

اس موقع پر ایس ٹی پی ٹھٹھہ کے ضلعی صدر جلال شاہ، جنرل سیکریٹری طارق امر عباسی اور دیگر عہدیداران بھی موجود تھے۔

اس سے قبل ڈاکٹر قادر مگسی کا جھرک، سونڈا اور چھتوچنڈ میں کارکنوں کی جانب سے استقبال کیا گیا۔

جلسے کے دوران مقررین نے سندھ کی وحدت، تعلیم، سماجی ترقی اور عوامی حقوق سے متعلق اپنے مؤقف کا اظہار کیا، جبکہ شرکاء نے ایس ٹی پی کی رابطہ مہم میں بھرپور شرکت کے عزم کا اظہار کیا۔