پیٹرولیم لیوی کے خلاف جماعت اسلامی کا ٹرین مارچ روہڑی پہنچ گیا،حافظ نعیم کا تحریک جاری رکھنے کا اعلان
حیدرآباد (جانو ڈاٹ پی کے)پیٹرولیم لیوی کے خلاف جماعت اسلامی کا ’سپر لانگ مارچ‘ کراچی سے اسلام آباد کی جانب پیش قدمی کرتے ہوئے حیدرآباد ریلوے اسٹیشن پہنچ گیا، جہاں امیر جماعت اسلامی حافظ نعیم الرحمان کا کارکنوں اور شہریوں کی جانب سے استقبال کیا گیا اور ان پر پھول نچھاور کیے گئے۔
حافظ نعیم الرحمان نے استقبال کرنے والے کارکنوں اور شہریوں کا شکریہ ادا کرتے ہوئے کہا کہ جماعت اسلامی نے عوام کے حقوق کے لیے تحریک شروع کی ہے اور ملک بھر سے قافلے اسلام آباد کی جانب روانہ ہو رہے ہیں۔ ان کے مطابق اس تحریک کا مقصد کسی فرد یا جماعت کا ذاتی ایجنڈا نہیں بلکہ عوام کے مسائل کی ترجمانی ہے۔
ریلوے اسٹیشن پر خطاب کرتے ہوئے حافظ نعیم الرحمان نے پیٹرولیم لیوی پر تنقید کی اور دعویٰ کیا کہ پیٹرول کی قیمت میں بھاری لیوی شامل ہے۔ ان کا کہنا تھا کہ عالمی مارکیٹ میں حالات بہتر ہونے کے باوجود عوام کو مکمل ریلیف نہیں مل رہا، جبکہ پیٹرولیم لیوی کا عالمی قیمتوں کے اتار چڑھاؤ سے براہ راست تعلق نہیں۔
امیر جماعت اسلامی نے حکومتی معاشی پالیسیوں کو بھی تنقید کا نشانہ بناتے ہوئے کہا کہ ملک کی معاشی مشکلات کا بوجھ عام شہریوں پر منتقل کیا جا رہا ہے جبکہ مراعات یافتہ طبقہ اپنی سہولتیں چھوڑنے کے لیے تیار نہیں۔ ان کے بقول موجودہ نظام میں امیر اور غریب دونوں پر ٹیکس کا بوجھ عائد کیا جا رہا ہے۔
حافظ نعیم الرحمان نے کہا کہ حکومت کی جانب سے مذاکرات کے لیے وفود آتے ہیں، تاہم عوام کو دینے کے لیے عملی ریلیف موجود نہیں۔ انہوں نے حیدرآباد میں جاری دھرنے اور احتجاج کو جاری رکھنے کا اعلان کرتے ہوئے کہا کہ جماعت اسلامی عوام کے حقوق کے لیے اپنی جدوجہد جاری رکھے گی۔
جماعت اسلامی کے مطابق کراچی سے روانہ ہونے والا ٹرین مارچ حیدرآباد کے بعد نواب شاہ، روہڑی اور سکھر کی جانب جائے گا، جہاں مزید کارکنوں اور شہریوں کے مارچ میں شامل ہونے کی توقع ہے۔
حافظ نعیم الرحمان نے کہا کہ ملک بھر سے لوگ اسلام آباد کی جانب روانہ ہو رہے ہیں اور جماعت اسلامی کی تحریک عوامی مطالبات کی منظوری تک جاری رہے گی۔ جماعت اسلامی پہلے ہی پیٹرولیم لیوی کے خاتمے کو اپنے احتجاج کا بنیادی مطالبہ قرار دے چکی ہے۔
