بنگلا دیش ویمنز کرکٹ میں بڑا فیصلہ، 132 وکٹیں لینے والی ناہیدہ اختر کپتان بن گئیں

ڈھاکا (جانو ڈاٹ پی کے)بنگلا دیش کرکٹ بورڈ نے لیفٹ آرم اسپنر ناہیدہ اختر کو ویمنز ٹی 20 انٹرنیشنل ٹیم کی نئی کپتان مقرر کر دیا ہے۔ وہ نگار سلطانہ کی جگہ قیادت سنبھالیں گی، جنہوں نے عہدے سے دستبردار ہونے کا فیصلہ کیا۔ ناہیدہ اختر ایک سال تک ٹیم کی کپتانی کریں گی، جبکہ مڈل آرڈر بیٹر شوبھنا کو نائب کپتان مقرر کیا گیا ہے۔

نگار سلطانہ نے 82 ٹی 20 انٹرنیشنل میچز میں بنگلا دیش کی قیادت کی اور ان کی سربراہی میں ٹیم نے 32 میچز جیتے۔ تاہم ایشیا کپ اور ایشین گیمز میں مایوس کن نتائج کے بعد انہوں نے کپتانی چھوڑ دی۔

25 سالہ ناہیدہ اختر نے ستمبر 2015 میں بین الاقوامی کرکٹ کا آغاز کیا تھا اور وہ بنگلا دیش کی ویمنز ٹی 20 انٹرنیشنل کرکٹ میں سب سے زیادہ وکٹیں لینے والی بولر ہیں۔ انہوں نے 17.38 کی اوسط سے 132 وکٹیں حاصل کر رکھی ہیں، جبکہ ان کی بہترین بولنگ 8 رنز دے کر 5 وکٹیں حاصل کرنا ہے۔ ون ڈے انٹرنیشنل کرکٹ میں بھی ان کے نام 81 وکٹیں درج ہیں۔

نائب کپتان شوبھنا بھی حالیہ دنوں میں نمایاں کارکردگی دکھا چکی ہیں۔ انہوں نے آسٹریلیا کے خلاف ون ڈے میچ میں تاریخی سنچری اسکور کرکے توجہ حاصل کی تھی۔ نئی قیادت کے ساتھ بنگلا دیش کی ٹیم آئندہ ٹی 20 مقابلوں میں اپنی کارکردگی بہتر بنانے کی کوشش کرے گی۔