نعیم حسن کی تباہ کن بولنگ، ویسٹ انڈیزکی آخری چاروکٹیں32رنز پر گرگئیں

ڈھاکا(جانو ڈاٹ پی کے)بنگلادیش نے ویسٹ انڈیز کے خلاف پہلے ٹیسٹ میچ کے دوسرے روز عمدہ بولنگ کرتے ہوئے مہمان ٹیم کو پہلی اننگز میں 245 رنز پر آؤٹ کردیا۔ بنگلادیش نے پہلی اننگز میں 272 رنز بنائے تھے، یوں اسے 27 رنز کی برتری حاصل ہوگئی۔

ویسٹ انڈیز نے دوسرے روز اپنی اننگز کا آغاز بہتر انداز میں کیا، تاہم کھانے کے وقفے کے بعد بیٹنگ لائن لڑکھڑا گئی۔ مہمان ٹیم نے آخری چار وکٹیں محض 32 رنز کے اضافے پر گنوائیں۔

بنگلادیش کے آف اسپنر نعیم حسن نے لوئر آرڈر کو نشانہ بناتے ہوئے اہم کامیابیاں حاصل کیں۔ انہوں نے شمار جوزف، جومیل واریکن اور جیڈن سیلز کو آؤٹ کرکے ویسٹ انڈیز کی اننگز سمیٹنے میں کلیدی کردار ادا کیا۔

ویسٹ انڈیز کی جانب سے ٹیگنارائن چندرپال نے 184 گیندوں پر 56 رنز کی مزاحمتی اننگز کھیلی، جبکہ جسٹن گریوز 46 رنز بناکر آؤٹ ہوئے۔ روسٹن چیز 43 رنز کے ساتھ ناٹ آؤٹ رہے۔

بنگلادیش کی مؤثر بولنگ کے باعث میزبان ٹیم نے پہلی اننگز میں اہم برتری حاصل کرلی ہے، جس سے میچ میں اس کی پوزیشن مستحکم ہوگئی ہے۔