مٹھی میں انٹرنیشنل لٹریسی ڈے 2026 کے حوالے سے تقریب، خواندگی کے فروغ پر زور
تھرپارکر (رپورٹ: میندھرو کاجھروی/ جانو ڈاٹ پی کے) نیشنل کمیشن فار ہیومن ڈویلپمنٹ (NCHD) تھرپارکر کی جانب سے ضلعی محکمہ تعلیم تھرپارکر کے تعاون سے انٹرنیشنل لٹریسی ڈے 2026 کے موقع پر مٹھی کے رائل پلیس ریسٹورنٹ ہال میں ایک اہم تقریب منعقد کی گئی۔
تقریب کا مقصد خواندگی اور تعلیم کی اہمیت کے حوالے سے عوام میں شعور اجاگر کرنا، تعلیم کے ذریعے افراد اور معاشرے کو بااختیار بنانا اور تھرپارکر کے دور دراز و پسماندہ علاقوں میں تعلیم اور خواندگی کے مواقع بڑھانے کے لیے مشترکہ کوششوں کو فروغ دینا تھا۔
تقریب میں ضلعی تعلیم افسر (پرائمری) تھرپارکر جناب نصر اللہ ساھڑ نے مہمانِ خصوصی کے طور پر شرکت کی، جبکہ NCHD تھرپارکر کے ڈپٹی ڈائریکٹر جناب اشوک کمار بھی موجود تھے۔ اس کے علاوہ TEO سیکنڈری مٹھی جناب صدیق دل، TEO مٹھی جناب عطا بجیر، TEO اسلام کوٹ جناب نور محمد جھنجھی، اسسٹنٹ ڈائریکٹر لٹریسی NCHD جناب برکت علی بجیر، اسسٹنٹ ڈائریکٹر NCHD جناب چندر کمار، سینئر ہیڈ ماسٹر جناب ہوچند، ہیڈ ماسٹر مٹھی جناب ہدایت اللہ بجیر، ہیڈ ماسٹر جناب شنکر لال، جناب پریتم، محکمہ تعلیم کے دیگر افسران، ہیڈ ٹیچرز، اساتذہ، طلبہ اور NCHD ٹیم کے ارکان نے شرکت کی۔
تقریب سے خطاب کرتے ہوئے مقررین نے انٹرنیشنل لٹریسی ڈے کی اہمیت، سماجی و معاشی ترقی میں خواندگی کے کردار اور تعلیم کو معاشرے کے ہر فرد تک پہنچانے کی ضرورت پر تفصیلی روشنی ڈالی۔
ضلعی تعلیم افسر تھرپارکر نصر اللہ ساھڑ، NCHD کے ڈپٹی ڈائریکٹر اشوک کمار، TEO سیکنڈری مٹھی صدیق دل، TEO مٹھی عطا بجیر اور TEO اسلام کوٹ نور محمد جھنجھی نے اپنے خطاب میں کہا کہ تھرپارکر کے دور دراز اور پسماندہ علاقوں میں تعلیم اور خواندگی کے فروغ کے لیے سرکاری اداروں، NCHD، اساتذہ، والدین اور مقامی کمیونٹی کے درمیان باہمی تعاون ناگزیر ہے۔
مقررین نے کہا کہ خواندگی صرف پڑھنے اور لکھنے کی صلاحیت کا نام نہیں بلکہ یہ فرد کے شعور، خودمختاری، بہتر روزگار، سماجی شمولیت اور ذمہ دار شہریت کی بنیاد ہے۔ اس موقع پر دور دراز علاقوں میں بچوں اور بالغ افراد تک تعلیم کی سہولیات پہنچانے کے لیے خدمات انجام دینے والے اساتذہ اور تعلیمی عملے کی کاوشوں کو بھی سراہا گیا۔
تقریب کے دوران NCHD کے مختلف خواندگی پروگراموں، کمیونٹی بیسڈ لٹریسی سرگرمیوں اور “Each One Teach One (EOTO)” مہم کی اہمیت کو بھی اجاگر کیا گیا۔ شرکاء نے اس بات پر زور دیا کہ ایسے پروگراموں کے ذریعے ان افراد تک بھی تعلیمی سہولیات پہنچائی جا سکتی ہیں جو کسی وجہ سے رسمی تعلیمی نظام سے باہر ہیں۔
این سی ایچ ڈی تھرپارکر کے نمائندگان نے کہا کہ ادارے کی جانب سے ضلعی محکمہ تعلیم اور مقامی کمیونٹیز کے تعاون سے خواندگی، EOTO اور تعلیم کے فروغ کے لیے کوششیں جاری رکھی جائیں گی۔ پائیدار خواندگی کے لیے کمیونٹی کی شمولیت، بہتر نگرانی، معیاری تدریس اور متعلقہ اداروں کے درمیان مضبوط رابطے کو ضروری قرار دیا گیا۔
تقریب کے اختتام پر شرکاء نے اس عزم کا اظہار کیا کہ تھرپارکر میں خواندگی کی شرح بہتر بنانے، بچوں، نوجوانوں اور بالغ افراد کے لیے تعلیمی مواقع بڑھانے اور تعلیم سے محروم طبقات تک سیکھنے کی سہولیات پہنچانے کے لیے مشترکہ کوششیں جاری رکھی جائیں گی۔
انٹرنیشنل لٹریسی ڈے 2026 کے حوالے سے منعقدہ تقریب میں تعلیم اور خواندگی کی اہمیت کو اجاگر کرنے کے ساتھ ساتھ NCHD اور ضلعی محکمہ تعلیم کے درمیان تعاون کو مزید مضبوط بنانے کے عزم کا اظہار کیا گیا، جبکہ EOTO کے تصور کو اسکول کی سطح پر فروغ دینے کے لیے بھی منصوبہ بندی کی گئی۔
