بھارتی نیوی میں جاسوسی کا بڑاانکشاف،31سالہ ملاح گرفتار

کوئمبٹور(جانوڈاٹ  پی کے)بھارتی بحریہ کے 31 سالہ ملاح پردیپ مکھرجی کو مبینہ طور پر حساس دفاعی معلومات ایک غیر ملکی انٹیلی جنس ایجنٹ تک پہنچانے کے الزام میں گرفتار کرلیا گیا۔

بھارتی میڈیا کے مطابق آندھرا پردیش پولیس کے کاؤنٹر انٹیلی جنس سیل نے پردیپ مکھرجی کو تمل ناڈو کے شہر کوئمبٹور میں واقع آئی این ایس اگرانی سے گرفتار کیا، جہاں وہ مینجمنٹ ڈویلپمنٹ کورس میں شرکت کر رہا تھا۔

مبینہ طور پر مغربی بنگال سے تعلق رکھنے والے پردیپ مکھرجی نے 2014 میں بھارتی بحریہ میں شمولیت اختیار کی تھی اور اس وقت وشاکھاپٹنم میں قائم ایسٹرن نیول کمانڈ کے ساتھ تعینات تھا۔ وہ گرفتاری سے تقریباً ایک ہفتہ قبل تربیتی کورس کے لیے کوئمبٹور پہنچا تھا۔

حکام کے مطابق ملاح کو سوشل میڈیا کے ذریعے ایک خاتون سے رابطے میں لایا گیا، جسے مبینہ طور پر پاکستانی انٹیلی جنس سے وابستہ آپریٹو قرار دیا گیا ہے۔ تفتیش کاروں کا کہنا ہے کہ خاتون نے گزشتہ چند ماہ کے دوران پردیپ سے رابطہ برقرار رکھا اور مبینہ طور پر اس تعلق کو استعمال کرتے ہوئے وشاکھاپٹنم نیول بیس سے متعلق حساس معلومات حاصل کیں۔

رپورٹس کے مطابق مبینہ طور پر حاصل کی گئی معلومات میں بحری اثاثوں، جنگی جہازوں کی نقل و حرکت اور وشاکھاپٹنم نیول بیس کے آپریشنل طریقہ کار سے متعلق معلومات شامل ہیں۔آندھرا پردیش پولیس کے کاؤنٹر انٹیلی جنس سیل نے مبینہ طور پر ملاح کی مشکوک ڈیجیٹل سرگرمیوں کا سراغ لگانے کے بعد اس کی نگرانی شروع کی۔ حکام کے مطابق ڈیجیٹل سرگرمیوں سے متعلق شواہد سامنے آنے کے بعد بحری حکام سے اجازت لے کر گرفتاری عمل میں لائی گئی۔

گرفتاری کے بعد پردیپ مکھرجی کو مقامی عدالت میں پیش کیا گیا اور بعد ازاں مزید تفتیش کے لیے وجے واڑہ منتقل کردیا گیا۔ حکام اس بات کا تعین کر رہے ہیں کہ مبینہ طور پر کتنی اور کس نوعیت کی دفاعی معلومات منتقل کی گئیں، جبکہ ممکنہ مالی لین دین سمیت دیگر روابط کی بھی تحقیقات جاری ہیں۔

تفتیش مکمل ہونے تک اس معاملے میں سامنے آنے والے الزامات کو حکام کے دعووں کے طور پر دیکھا جا رہا ہے۔