ایشین گیمز: پاکستان کے کھلاڑیوں کا دھواں دار ایکشن،9کھیلوں میں مقابلے
ناگویا (جانو ڈاٹ پی کے) جاپان کے شہر ایچی ناگویا میں جاری 20ویں ایشین گیمز 2026 کے ساتویں روز جمعرات کو پاکستان کے کھلاڑی 9 مختلف کھیلوں کے مقابلوں میں حصہ لیں گے۔ ایشین گیمز 19 ستمبر سے 4 اکتوبر تک جاری ہیں۔
سوئمنگ میں خواتین کے 50 میٹر فری اسٹائل کی پہلی ہیٹ میں مشعل عائشہ حیات ایوب جبکہ مردوں کے 50 میٹر بٹر فلائی کی پانچویں ہیٹ میں حمزہ آصف ایکشن میں ہوں گے۔
فینسنگ کے مینز ایپی انفرادی مقابلے میں محمد وقاص قیرغزستان، قطر، جاپان، منگولیا، بنگلہ دیش اور ہانگ کانگ کے حریفوں کا سامنا کریں گے، جبکہ عبدالمصور منگولیا، سنگاپور، ہانگ کانگ، ازبکستان، سعودی عرب اور متحدہ عرب امارات کے کھلاڑیوں کے خلاف میدان میں اتریں گے۔
ٹیبل ٹینس کے مینز سنگلز کے پہلے راؤنڈ میں محمد خان طحٰہ بلال کامیابی کے لیے کوشش کریں گے۔
اسکواش کے مینز سنگلز میں عالمی انڈر 23 چیمپئن نور زمان اور محمد اشہب عرفان راؤنڈ آف 16 میں جگہ بنانے کے لیے ایکشن میں ہوں گے۔ پاکستان اسکواش کے مطابق نور زمان اور محمد اشہب نے بدھ کو اپنے ابتدائی میچز جیت کر آخری 16 میں جگہ بنالی تھی۔
ویمنز باکسنگ کے 51 کلوگرام مقابلے میں ماریہ کا منگولیا کی باکسر سے مقابلہ ہوگا، جبکہ مردوں کے لائٹ ویٹ مقابلے میں اسد اقبال ایکشن میں ہوں گے۔
کبڈی میں پاکستان کا مقابلہ مضبوط حریف ایران سے ہوگا، جبکہ ہاکی کے پول بی میں قومی ٹیم چین کے خلاف میدان میں اترے گی۔ دستیاب شیڈول کے مطابق پاکستان اور چین کا ہاکی میچ 24 ستمبر کو کھیلا جائے گا۔
ایتھلیٹکس میں قومی ویمن چیمپئن فائقہ ریاض خواتین کی 100 میٹر دوڑ کے پہلے راؤنڈ میں پاکستان کی نمائندگی کریں گی۔
یوں ایشین گیمز کے ساتویں روز پاکستانی ایتھلیٹس سوئمنگ، فینسنگ، ٹیبل ٹینس، اسکواش، باکسنگ، کبڈی، ہاکی، ایتھلیٹکس سمیت مختلف کھیلوں میں اپنی صلاحیتوں کا مظاہرہ کریں گے۔
