سعودی عرب میں فضائی آپریشن متاثر، پاکستان کی 28 ریاض پروازیں منسوخ، سیکڑوں مسافر پریشان
ذرائع کے مطابق ریاض ایئرپورٹ کی بندش کے باعث آج پاکستان سے ریاض آنے اور جانے والی مزید 28 پروازیں منسوخ کردی گئی ہیں۔ شیڈول کے مطابق ریاض ایئرپورٹ 17 اکتوبر کی رات 12 بجے تک بند رہے گا، جس کے باعث دونوں ممالک کے درمیان فضائی آپریشن متاثر ہونے کا سلسلہ جاری ہے۔
پروازوں کے شیڈول میں تبدیلی کے باعث پاکستان انٹرنیشنل ایئرلائنز (پی آئی اے) نے ملتان سے ریاض جانے والی پرواز پی کے 765 کو متبادل ایئرپورٹ کے لیے روانہ کردیا۔ کراچی سے جدہ جانے والی دو پروازیں بھی منسوخ کردی گئیں، جبکہ سیالکوٹ اور ملتان سے دمام جانے والی ایک، ایک پرواز منسوخی کی زد میں آگئی۔
دوسری جانب لاہور سے مدینہ جانے والی سعودی ایئرلائن کی پروازوں ایس وی 724 اور ایس وی 725 میں پانچ گھنٹے کی تاخیر ہوئی۔ لاہور سے اسکردو جانے والی چار پروازیں بھی ڈھائی سے تین گھنٹے تاخیر کا شکار رہیں، جس سے مسافروں کو مشکلات کا سامنا کرنا پڑا۔
فضائی آپریشن میں خلل کے اثرات اندرونِ ملک پروازوں پر بھی نمایاں رہے۔ کراچی سے لاہور جانے والی پانچ پروازوں میں تین سے آٹھ گھنٹے تک تاخیر ریکارڈ کی گئی، جبکہ کراچی سے اسلام آباد جانے والی سات پروازیں ایک سے پانچ گھنٹے تاخیر کا شکار ہوئیں۔
پروازوں کی منسوخی اور تاخیر کے باعث مسافروں کے سفری منصوبے متاثر ہوئے ہیں۔ سعودی عرب جانے یا وہاں سے پاکستان آنے والے مسافروں کو ہدایت کی جاتی ہے کہ ایئرپورٹ روانہ ہونے سے پہلے متعلقہ ایئرلائن سے پرواز کی تازہ صورتحال کی تصدیق کرلیں۔
