آزاد کشمیر میں ہیلی کاپٹر حادثہ،فنی خرابی یا ہولناک سازش؟

​مظفر آباد(خصوصی رپورٹ:جانو ڈاٹ پی کے)​آزاد کشمیر میں عوامی جوائنٹ ایکشن کمیٹی کی جانب سے جاری ہڑتال اور احتجاجی تحریک کے دوران ایک افسوسناک واقعے نے خطے کی صورتحال کو مزید پیچیدہ بنا دیا ہے۔ پاک فوج کا ایک ایم آئی 17 ہیلی کاپٹر، جو تکنیکی خرابی کے باعث حادثے کا شکار ہوا، میں سوار تمام افسران و اہلکار شہید ہو گئے ہیں۔ آئی ایس پی آر نے حادثے کی تصدیق کرتے ہوئے اسے فنی خرابی کا نتیجہ قرار دیا ہے اور واقعے کی تحقیقات کے لیے کمیٹی تشکیل دے دی گئی ہے۔ دوسری جانب آزاد کشمیر میں جاری احتجاجی تحریک کے حوالے سے وزیراعظم آزاد کشمیر کی زیر صدارت اعلیٰ سطحی اجلاس میں سخت گیر موقف اپناتے ہوئے واضح کیا گیا ہے کہ قانون کو ہاتھ میں لینے والے شرپسند عناصر کے خلاف ریاستی رٹ برقرار رکھی جائے گی۔ سیکیورٹی فورسز کے مطابق، مظاہرین کی جانب سے پولیس اہلکاروں پر سیدھی گولیاں چلائی گئی ہیں جس کے نتیجے میں متعدد جوان زخمی ہوئے، جبکہ سیکیورٹی رسپانس میں جوابی کارروائی کے دوران بھی ہلاکتیں ہوئی ہیں۔ حکومتی حلقوں کا ماننا ہے کہ آزاد کشمیر میں جاری یہ انتشار ایک سوچی سمجھی سازش کا حصہ ہے، جس کا مقصد پاکستان کی داخلی سلامتی اور ریاستی اداروں کو کمزور کرنا ہے۔ ملک دشمن عناصر، جو اس انتشار کو ہوا دے رہے ہیں، ان کے مذموم عزائم کو بے نقاب کرنے اور ملکی سالمیت کا دفاع کرنے کے لیے ریاستی اداروں اور سیاسی قیادت کو یکجا ہو کر کام کرنے کی ضرورت ہے۔