تین رکنی عبوری کونسل قائم! آیت اللہ علی خامنہ ای کی شہادت کے بعد سپریم لیڈر کون ہوگا ؟
تہران(مانیٹرنگ ڈیسک)ایران نے سپریم لیڈر آیت اللہ علی خامنہ ای کی شہادت کے بعد عبوری قیادت کے لیے ایک تین رکنی کونسل قائم کر دی ہے۔ یہ فیصلہ ملک کے آئین کے مطابق کیا گیا ہے جب سپریم لیڈر کا عہدہ خالی ہو جائے یا وہ اسے انجام دینے سے قاصر ہو جائیں تو ایسا انتظام کیا جاتا ہے۔
ایرانی سرکاری ٹی وی اور دیگر ریاستی میڈیا نے تصدیق کی ہے کہ علی شمخانی (جو سپریم نیشنل سیکیورٹی کونسل کے سیکریٹری اور ایک اہم مشیر تھے) اور پاسداران انقلاب اسلامی (IRGC) کے کمانڈر میجر جنرل محمد پاکپور بھی امریکہ اور اسرائیل کے مشترکہ حملوں میں شہید ہو گئے ہیں۔ یہ حملے تہران میں ہوئے اور ان میں متعدد اعلیٰ عہدیداروں سمیت سپریم لیڈر بھی نشانہ بنے۔
اس عبوری کونسل میں ایران کے موجودہ صدر (مسعود پزشکیان)، عدلیہ کے سربراہ (چیف جسٹس غلامحسین محسنی اژئی) اور نگہبان کونسل (گارڈین کونسل) کا ایک فقیہ شامل ہے جسے ایکسپیڈینسی کونسل منتخب کرتی ہے۔ یہ کونسل نئے سپریم لیڈر کے انتخاب تک تمام ریاستی ذمہ داریاں اور اختیارات سنبھالے گی۔
ایران کے آئین میں یہ انتظام پہلے سے موجود ہے کہ ایسی صورتحال میں یہ تین رکنی ٹیم عارضی طور پر قیادت کرے گی جبکہ مجلس خبرگان (ایسے ملی) جلد از جلد نئے رہبر کا انتخاب کرے گی۔ یہ عمل آئینی طور پر فوری طور پر شروع ہو گا تاکہ ملک میں استحکام برقرار رہے۔
یہ صورتحال ایران کی سیاسی تاریخ میں ایک نازک موڑ ہے، جہاں ملک امریکہ اور اسرائیل کے حملوں کے جواب میں مزید اقدامات بھی کر رہا ہے اور داخلی سطح پر سوگ اور عبوری دور کا آغاز ہو چکا ہے۔
