سیالکوٹ: ڈسکہ روڈ پر خوفناک حادثہ، 2 بچوں سمیت 5 افراد جاں بحق

سیالکوٹ (جانوڈاٹ پی کے) ڈسکہ روڈ پر گھوئینکی کے قریب پیٹرول پمپ کے پاس ایک المناک ٹریفک حادثے میں 2 بچوں سمیت 5 افراد جاں بحق جبکہ ایک شخص شدید زخمی ہو گیا۔

ذرائع کے مطابق اینٹوں سے لوڈڈ ایک ٹریکٹر ٹرالی سڑک کے کنارے کھڑی تھی کہ ڈسکہ کی جانب سے آنے والی ایک تیز رفتار کار بے قابو ہو کر ٹرالی سے جا ٹکرائی۔ ٹکر اتنی شدید تھی کہ کار مکمل طور پر تباہ ہو گئی۔

حادثے کی اطلاع ملتے ہی ریسکیو 1122 سیالکوٹ کی متعدد گاڑیاں اور امدادی ٹیمیں فوری طور پر موقع پر پہنچ گئیں، جنہوں نے زخمی کو ابتدائی طبی امداد کے بعد قریبی اسپتال منتقل کیا جبکہ جاں بحق افراد کی لاشیں تحویل میں لے لی گئیں۔

ذرائع کا کہنا ہے کہ جاں بحق ہونے والے تمام افراد کا تعلق ایک ہی خاندان سے ہے۔ پولیس نے واقعے کی تحقیقات شروع کر دی ہیں تاکہ حادثے کی وجوہات کا تعین کیا جا سکے۔