پاک بھارت جنگ: چین کا پہلی بار جے 10 سی طیارے کی کامیابی کا باضابطہ اعلان
بیجنگ (مانیٹرنگ ڈیسک)چین کی قومی دفاعی سائنس و ٹیکنالوجی صنعت بیورو نے پہلی بار باضابطہ طور پر اعتراف کیا ہے کہ چینی ساختہ جنگی طیارہ جے-10 سی ای نے مئی 2025 میں اپنی پہلی عملی جنگی کامیابی حاصل کی۔
چینی حکام کے مطابق جے-10 سی ای طیاروں نے مئی میں ہونے والی ایک فضائی جھڑپ کے دوران متعدد دشمن طیاروں کو مار گرایا جبکہ خود کسی قسم کے نقصان سے محفوظ رہے۔ اگرچہ بیان میں کسی ملک کا نام نہیں لیا گیا، تاہم مئی میں ہونے والی پاک-بھارت کشیدگی کا بالواسطہ حوالہ دیا گیا ہے۔
یہ پہلا موقع ہے کہ چین کے کسی سرکاری ادارے نے جے-10 سی ای کی میدانِ جنگ میں کامیابی کی تصدیق کی ہو۔ یاد رہے کہ پاکستان کی مسلح افواج نے مئی میں ہونے والی جھڑپ کے فوری بعد رافال سمیت بھارت کے چھ طیارے مار گرانے کا اعلان کیا تھا، جبکہ نومبر میں اقوام متحدہ کی جنرل اسمبلی سے خطاب کے دوران وزیر اعظم شہباز شریف نے یہ تعداد سات بتائی تھی۔
امریکی صدر ڈونلڈ ٹرمپ بھی متعدد مواقع پر مئی کی جنگ میں سات سے آٹھ بھارتی طیاروں کے مار گرائے جانے کا ذکر کر چکے ہیں، جبکہ بھارتی افواج کے سربراہ جنرل انیل چوہان نے گزشتہ برس سنگاپور میں اپنے طیاروں کے نقصان کا اعتراف کیا تھا، تاہم درست تعداد ظاہر نہیں کی گئی۔
چین کے سٹیٹ ایڈمنسٹریشن آف سائنس، ٹیکنالوجی اینڈ انڈسٹری فار نیشنل ڈیفینس (SASTIND) کے مطابق جے-10 سی ای ایک مکمل طور پر چین میں تیار کردہ، آل ویدر، سنگل انجن اور سنگل سیٹ ملٹی رول جنگی طیارہ ہے، جو فضائی برتری، انٹرسیپشن اور مختلف نوعیت کے حملوں کی بھرپور صلاحیت رکھتا ہے۔
چینی سرکاری خبر ایجنسی کا کہنا ہے کہ جے-10 سی ای کی یہ جنگی کارکردگی 2025 کی چین کی دس اہم ترین دفاعی کامیابیوں میں شامل کی گئی ہے، جس نے بین الاقوامی دفاعی ماہرین اور عالمی ہوابازی صنعت کی بھرپور توجہ حاصل کی ہے۔
چینی حکام کے مطابق اس کامیابی سے نہ صرف جے-10 سی ای کی عملی افادیت ثابت ہوتی ہے بلکہ اس سے دیگر چینی دفاعی مصنوعات کی عالمی منڈیوں میں رسائی اور مسابقتی حیثیت مزید مضبوط ہوگی۔
