ٹرمپ کے ساتھ وہی ہوگا جو فرعون، نمرود اور رضا شاہ کے ساتھ ہوا، آیت اللہ خامنہ ای

تہران (مانیٹرنگ ڈیسک) ایران کے سپریم لیڈر آیت اللہ خامنہ ای نے امریکی صدر ڈونلڈ ٹرمپ کو سخت انتباہ دیتے ہوئے کہا ہے کہ ’’فرعون، نمرود اور رضا شاہ کے ساتھ جو ہوا، وہی ٹرمپ کے ساتھ ہوگا‘‘۔

سوشل میڈیا پر جاری بیان میں آیت اللہ خامنہ ای نے کہا کہ غرور میں ڈوبا ایک شخص پوری دنیا کے فیصلے کر رہا ہے، اسے یہ سمجھنا چاہیے کہ تاریخ میں طاقتور ترین حکمرانوں کے انجام سے سبق لیا جائے۔

ایرانی صدر مسعود پزشکیان نے بھی امریکا اور اسرائیل کو ایران میں جاری فسادات کا ذمہ دار قرار دیا۔ ایرانی میڈیا کو دیے گئے انٹرویو میں انہوں نے کہا کہ امریکا اور اسرائیل عوام کو ہدایات دے رہے ہیں کہ ’’ہم تمہارے ساتھ ہیں، جاؤ تخریب کاری کرو‘‘، اور یہ وہی قوتیں ہیں جو ماضی میں ایران پر حملے کر چکی ہیں۔

صدر پزشکیان نے مزید کہا کہ پرامن احتجاج عوام کا حق ہے، لیکن کسی غیر ملکی کو ایران میں انتشار پھیلانے کی اجازت نہیں دی جائے گی۔

ادھر امریکی صدر ڈونلڈ ٹرمپ نے کہا ہے کہ ایران مذاکرات کرنا چاہتا ہے اور اس سلسلے میں ملاقات کا انتظام کیا جا رہا ہے۔ تاہم، امریکا ایران کے خلاف مختلف طاقتور آپشنز پر غور کر رہا ہے۔