وزیرآباد: پریمیئر لاء کالج میں انٹر کالجیٹ تقریری مقابلہ، طلبہ کی شاندار کارکردگی

وزیرآباد (جانوڈاٹ پی کے)پریمیئر لاء کالج میں تقریری مقابلہ، مختلف جامعات کے طلبہ کی شاندار کارکردگی۔پریمیئر لاء کالج وزیرآباد کی لٹریری اینڈ ڈبیٹنگ سوسائٹی کے زیر اہتمام انٹر کالجیٹ تقریری مقابلے کا انعقاد کیا گیا، جس میں مختلف لاء کالجز اور یونیورسٹیز سے تعلق رکھنے والے طلبہ و طالبات نے شرکت کی۔ مقابلے کا مقصد طلبہ میں اظہارِ خیال، تنقیدی سوچ اور قانون سے متعلق فکری صلاحیتوں کو اجاگر کرنا تھا۔تقریب کی صدارت ڈائریکٹر پریمیئر لاء کالج وزیرآباد سلیم شاہین ایڈووکیٹ نے کی، تقریب کے مہمان خصوصی اسسٹنٹ کمشنر جواد حسین پیر زادہ تھے۔ جبکہ دیگر معزز مہمانوں میں سر سعد سعود تاڑر، محمد عمر محبوب ایڈووکیٹ، ایڈمن عثمان اصغر، لیکچرار سید انظر محمود شاہ، ملک محمد آصف ایڈووکیٹ، میڈم صبائینہ ایڈووکیٹ، سر معظم رشید، سید جنیدالحسن شاہ، شاہد اللہ خان ایڈووکیٹ اور رخسار امین ایڈووکیٹ شامل تھے۔مقررین نے طلبہ سے خطاب کرتے ہوئے کہا کہ تقریری اور ادبی سرگرمیاں قانون کے طلبہ کی شخصیت سازی میں اہم کردار ادا کرتی ہیں۔ ایسے مقابلے نہ صرف اعتماد میں اضافہ کرتے ہیں بلکہ مستقبل کے وکلاء کو عملی زندگی کے لیے بھی تیار کرتے ہیں۔ انہوں نے لٹریری اینڈ ڈبیٹنگ سوسائٹی کے کردار کو سراہتے ہوئے کہا کہ یہ پلیٹ فارم طلبہ کو اپنی صلاحیتوں کے اظہار کا بھرپور موقع فراہم کر رہا ہے۔تقریری مقابلے میں گجرات یونیورسٹی کے طالب علم سید علی اصغر نے شاندار کارکردگی کا مظاہرہ کرتے ہوئے پہلی پوزیشن حاصل کی۔ لنکن لاء کالج کی طالبہ ام حبیبہ نے دوسری پوزیشن حاصل کی جبکہ گجرات یونیورسٹی ہی کے طالب علم محمد تیمور نے تیسری پوزیشن اپنے نام کی۔آخر میں کامیاب طلبہ میں اسناد تقسیم کی گئیں اور شرکاء نے اس امید کا اظہار کیا کہ مستقبل میں بھی اس نوعیت کی علمی و ادبی سرگرمیوں کا انعقاد جاری رکھا جائے گا۔