ملتان میں بھی کینسر کے مریضوں کا مفت علاج ہوگا، عظمیٰ بخاری

لاہور (جانوڈاٹ پی کے) وزیر اطلاعات پنجاب عظمیٰ بخاری نے کہا ہے کہ لاہور کے بعد ملتان میں بھی کینسر کے مریضوں کے مفت علاج کی سہولت فراہم کی جائے گی۔

اپنے بیان میں عظمیٰ بخاری نے کہا کہ وزیراعلیٰ پنجاب مریم نواز نے ملتان میں کینسر کے علاج کے لیے کوابلیشن اور کینسر سینٹر کا افتتاح کردیا ہے، جہاں کینسر کے مختلف مراحل میں مبتلا مریضوں کو مفت علاج کی سہولت فراہم کی جائے گی۔

وزیر اطلاعات پنجاب کے مطابق کینسر کے مریضوں کو علاج کے لیے طویل انتظار یا تاریخوں کا سامنا نہیں کرنا پڑے گا، جبکہ علاج کا دورانیہ تقریباً 60 منٹ تک محدود رکھنے کا انتظام کیا گیا ہے۔

عظمیٰ بخاری نے کہا کہ پنجاب میں کینسر کے علاج کی یہ سہولت صحت کے شعبے میں اہم اقدام ہے۔ ان کے مطابق لاہور میں پاکستان کا ایک ہزار بستروں پر مشتمل نواز شریف کینسر ہسپتال بھی مکمل ہوچکا ہے۔

انہوں نے کہا کہ نواز شریف کینسر ہسپتال جدید سہولیات سے آراستہ منصوبہ ہے اور ان کے بقول یہ ہسپتال بھی پاکستان کڈنی اینڈ لیور انسٹی ٹیوٹ (PKLI) کی طرح عالمی سطح پر پاکستان کی شناخت بن سکتا ہے۔

سیاسی معاملات پر گفتگو کرتے ہوئے عظمیٰ بخاری نے کہا کہ مریم نواز کا کسی صوبائی حکومت سے مقابلہ یا موازنہ نہیں۔ ان کا کہنا تھا کہ سیاسی مخالفین کارکردگی کے بجائے ذاتی تنقید کے ذریعے عوام کو گمراہ کرنے کی کوشش کر رہے ہیں۔

انہوں نے خیبرپختونخوا کی سیاسی صورتحال پر بھی تنقید کی اور مختلف سیاسی واقعات کے حوالے سے اپنے الزامات اور مؤقف کا اظہار کیا۔ عظمیٰ بخاری نے 9 مئی اور 26 نومبر کے واقعات کا حوالہ دیتے ہوئے 27 ستمبر سے متعلق بھی دعویٰ کیا۔

وزیر اطلاعات پنجاب نے خیبرپختونخوا کے والدین سے اپیل کی کہ وہ اپنے بچوں کو سیاسی سرگرمیوں سے دور رکھیں۔ انہوں نے بانی پی ٹی آئی کے اہلخانہ اور ان کے سیاسی طرزِ عمل سے متعلق بھی تنقیدی مؤقف اختیار کیا۔