پاک بھارت جنگ میں پانچ بھارتی طیارے مار گرائے گئے: ٹرمپ کا بڑا دعویٰ

واشنگٹن (ویب ڈیسک): واشنگٹن میں ریپبلکن اراکینِ کانگریس سے خطاب کرتے ہوئے سابق امریکی صدر ڈونلڈ ٹرمپ نے انکشاف کیا ہے کہ پاکستان اور بھارت کے درمیان حالیہ کشیدگی کے دوران پانچ بھارتی جنگی طیارے مار گرائے گئے تھے۔

ٹرمپ کا کہنا تھا کہ دونوں جوہری طاقتیں ایک خطرناک جنگ کے دہانے پر کھڑی تھیں، اور صورتحال انتہائی سنگین ہو چکی تھی۔ ان کے بقول، اگر فوری مداخلت نہ کی جاتی تو ایٹمی جنگ چھڑنے کا خدشہ تھا۔

سابق صدر نے کہا میرے اندازے کے مطابق پانچ طیارے گرائے گئے، حالات تیزی سے بگڑ رہے تھے، لیکن میں نے ذاتی طور پر اس جنگ کو رکوا دیا۔

ٹرمپ نے واضح طور پر یہ نہیں کہا کہ بھارتی طیارے مار گرائے، تاہم ان کا یہ بیان کشیدگی کی شدت کو ظاہر کرتا ہے۔

یاد رہے کہ حالیہ کشیدگی کا آغاز اپریل میں مقبوضہ کشمیر کے علاقے پہلگام میں ہوئے ایک حملے سے ہوا تھا، جس میں 26 افراد ہلاک ہوئے۔ بھارت نے بغیر کسی ٹھوس ثبوت کے اس حملے کا الزام پاکستان پر عائد کیا، تاہم اسلام آباد نے اس الزام کو سختی سے مسترد کرتے ہوئے معاملے کی شفاف اور غیر جانبدار تحقیقات کی پیشکش کی تھی۔

امریکا نے اس حملے کی مذمت کی تھی، لیکن بھارت کے الزامات کی حمایت نہیں کی تھی۔ امریکی محکمہ خارجہ کی جانب سے بھی اس معاملے میں محتاط موقف اختیار کیا گیا۔

سیاسی و سفارتی حلقوں میں ٹرمپ کے حالیہ بیان کو پاک بھارت تعلقات پر اثر انداز ہونے والا قرار دیا جا رہا ہے، جب کہ ماہرین اس دعوے کے پسِ منظر اور اس کے ممکنہ مضمرات پر بھی نظر رکھے ہوئے ہیں۔