خیبر پختونخوا میں ایمرجنسی کا نفاذ وقت کی اہم ضرورت تھی، مصطفیٰ کمال
اسلام آباد(جانوڈاٹ پی کے) وفاقی وزیر صحت مصطفیٰ کمال نے کہا ہے کہ خیبر پختونخوا میں ایمرجنسی کا نفاذ وقت کی اہم ضرورت تھی، دہشت گردی کے خاتمے اور عوام کے جان و مال کے تحفظ کے لیے مؤثر اقدامات ناگزیر ہیں۔
وفاقی دارالحکومت میں میڈیا سے گفتگو کرتے ہوئے مصطفیٰ کمال نے کہا کہ شہریوں کی جان، مال اور عزت کا تحفظ ریاست کی اولین ذمہ داری ہے۔ حکومت دہشت گردی کے خلاف عدم برداشت کی پالیسی پر عمل پیرا ہے اور اس ناسور کے خاتمے کے لیے تمام ضروری اقدامات کیے جانے چاہییں۔
وفاقی وزیر صحت کا کہنا تھا کہ خیبر پختونخوا میں ایمرجنسی کا نفاذ سکیورٹی اداروں کو دہشت گرد عناصر کے مکمل خاتمے کے لیے معاونت فراہم کرے گا۔ ان کے مطابق اس اقدام سے صوبے میں امن و امان کی صورت حال بہتر بنانے اور شہریوں کو تحفظ فراہم کرنے میں مدد مل سکتی ہے۔
مصطفیٰ کمال نے مزید کہا کہ دہشت گردی کے خاتمے کے لیے مؤثر حکمت عملی اپنانا وقت کا تقاضا ہے۔ عوام کے محفوظ مستقبل اور پائیدار امن کو یقینی بنانے کے لیے تمام متعلقہ اداروں کو اپنا کردار ادا کرنا ہوگا تاکہ شہری بلا خوف و خطر زندگی گزار سکیں۔
انہوں نے اس عزم کا اظہار کیا کہ خیبر پختونخوا سمیت پورے پاکستان کو امن کا گہوارہ بنانے کے لیے کوششیں جاری رکھی جائیں گی۔ ان کا کہنا تھا کہ ملک میں پائیدار امن کا قیام اور عوام کے جان و مال کا تحفظ حکومت کی اہم ترجیحات میں شامل ہونا چاہیے۔
