تھرپارکر:چارنور کے قریب ابوبکر کی ڈانی میں زمین کے تنازع پر کشیدگی، فائرنگ، خونریزی کا خدشہ

تھرپارکر(رپورٹ: میندھرو کاجھروی/جانو ڈاٹ پی کے) کھینسر پولیس تھانے کی حد گاؤں چارنور کے نزدیک ابوبکر کی ڈانی میں زمین کے تنازع پر دو فریقوں کے درمیان شدید کشیدگی پیدا ہو گئی ہے۔ اطلاعات کے مطابق یو سی چیئرمین سونا خان رند اور ان کے رشتہ داروں نے مبینہ طور پر ابو بکر راہمون اور دین محمد راہمون کی زمین پر قبضہ کرنے کی کوشش کی۔ ذرائع کے مطابق سونا خان رند مبینہ طور پر تقریباً 200 افراد کے ہمراہ ابو بکر راہمون کے گھروں پر ہوائی فائرنگ کرتے ہوئے پہنچے، جس کے بعد دونوں فریقوں کے افراد مورچہ بند ہو گئے۔ علاقے میں شدید خوف و ہراس پایا جا رہا ہے اور کسی بھی وقت خونریزی کا خدشہ ظاہر کیا جا رہا ہے۔ واقعے کے مقام پر تھانہ کھینسر کی پولیس کی ایک موبائل اور چار پولیس اہلکار موجود ہیں، جبکہ مقامی ذرائع کے مطابق رند برادری کی جانب سے مبینہ طور پر فائرنگ کا سلسلہ جاری ہے۔ واضح رہے کہ دین محمد راہمون کی زمین، بیگوٹی نمبر 426/131 سے متعلق مقدمہ اس وقت مٹھی کی عدالت میں زیرِ سماعت ہے۔واقعے کے حوالے سے پولیس یا متعلقہ فریقین کا سرکاری مؤقف تاحال سامنے نہیں آ سکا، جبکہ علاقہ مکینوں نے انتظامیہ سے مطالبہ کیا ہے کہ فوری مداخلت کر کے صورتحال کو قابو میں لایا جائے تاکہ کسی بھی جانی نقصان سے بچا جا سکے۔