ایران کا کویت میں امریکی فوجی اڈے پر میزائل حملے کا دعویٰ، آبنائے ہرمز میں آئل ٹینکر بھی نشانہ بن گیا

تہران(مانیٹرنگ ڈیسک)ایران کی فوج نے دعویٰ کیا ہے کہ اس نے کویت میں واقع امریکی فوجی اڈے کیمپ عریفجان میں نصب امریکی ہمارز میزائل سسٹمز کو زمین سے زمین پر مار کرنے والے میزائلوں سے نشانہ بنایا ہے۔

ایرانی پاسداران انقلاب سے وابستہ خبر رساں ادارے تسنیم کے مطابق یہ حملہ پیر کے روز کیا گیا، تاہم امریکی یا کویتی حکام کی جانب سے اس دعوے کی فوری طور پر نہ تو تصدیق کی گئی ہے اور نہ ہی تردید سامنے آئی ہے۔

دوسری جانب پاسداران انقلاب سے منسلک ایک اور خبر رساں ادارے فارس نے رپورٹ کیا ہے کہ جنوبی ایران کے قریب سمندری حدود میں ایک یونانی آئل ٹینکر نامعلوم حملے کا نشانہ بنا، جس کے بعد وہ سمندر میں رک گیا۔

فارس نیوز کے مطابق آبنائے ہرمز میں اس سے قبل نامعلوم پروجیکٹائل کی زد میں آنے والے ایک دوسرے آئل ٹینکر کی شناخت بھی کویتی ٹینکر کے طور پر کی گئی ہے۔

تاحال ان بحری واقعات کی آزاد ذرائع یا متعلقہ حکام کی جانب سے باضابطہ تصدیق نہیں کی گئی، تاہم ان دعوؤں نے خطے میں جاری کشیدگی اور عالمی توانائی کی ترسیل سے متعلق خدشات میں مزید اضافہ کر دیا ہے۔