روس اور یوکرین کے درمیان جنگی قیدیوں کا تبادلہ، دونوں ممالک کے 540 فوجی رہا
ماسکو (ویب ڈیسک) روس اور یوکرین کے درمیان جنگی قیدیوں کے تبادلے کے تحت دونوں ممالک کے 270، 270 فوجیوں کو رہا کر دیا گیا، جس کے بعد مجموعی طور پر 540 فوجیوں کی اپنے اپنے ملک واپسی کی راہ ہموار ہو گئی ہے۔
روسی وزارتِ دفاع کے مطابق 23 اکتوبر کو یوکرین کے زیرِ کنٹرول علاقوں سے 270 روسی فوجیوں کو واپس لایا گیا، جبکہ اس کے بدلے روسی تحویل میں موجود 270 یوکرینی جنگی قیدیوں کو رہا کیا گیا۔
رہائی پانے والے روسی فوجیوں کو لے کر دو فوجی ٹرانسپورٹ طیارے ماسکو ریجن پہنچ گئے۔ روسی حکام کے مطابق فوجیوں کو لے کر آنے والے دونوں الیوشن آئی ایل 76 ایم ڈی طیاروں نے ماسکو کے علاقے میں لینڈنگ کی۔
روسی وزارتِ دفاع کا کہنا ہے کہ قیدیوں کا یہ تبادلہ دونوں ممالک کے درمیان جنگی قیدیوں کی واپسی کے جاری عمل کا حصہ ہے، جس کے تحت گرفتار فوجیوں کو اپنے وطن واپس بھیجنے کے انتظامات کیے جاتے ہیں۔
روس اور یوکرین کے درمیان جاری جنگ کے دوران جنگی قیدیوں کا تبادلہ ان محدود معاملات میں شامل ہے جن پر دونوں فریقوں کے درمیان عملی تعاون جاری ہے۔ تازہ تبادلے کے نتیجے میں دونوں جانب کے سینکڑوں فوجیوں کو اپنے اہلِ خانہ کے پاس واپس پہنچنے کا موقع ملے گا۔
