فرحان اختر کیساتھ تنازع،رنویر سنگھ پر پابندی عائد،اداکارکا ردعمل سامنے آگیا، خاموشی اختیار کرنے کی وضاحت

ممبئی(جانوڈاٹ پی کے) فیڈریشن آف ویسٹرن انڈیا سنی ایمپلائز (FWICE) نے فلم ساز فرحان اختر کی فلم ڈان 3 سے اچانک علیحدہ کے بعد پیدا ہونے والے تنازع کے بعد اداکار رنویر سنگھ پر پابندی لگادی۔ 

پریس کانفرنس میں فیڈریشن نے اعلان کیا کہ جب تک رنویر سنگھ فرحان اختر کے ساتھ 45 کروڑ کے نقصانات کے معاملے کو حل نہیں کرتے تب تک فلمی صنعت رنویر کے ساتھ کام نہ کرے۔

فرحان اختر کی ایکسَل انٹرٹینمنٹ نے اپریل میں شکایت درج کروائی تھی کہ رنویر سنگھ نے تین فلموں کا معاہدہ کیا تھا لیکن انہوں نے آخری وقت میں ڈان 3 سے علیحدگی اختیار کر لی۔

پروڈیوسرز نے مطالبہ کیا کہ تمام پری پروڈکشن اخراجات رنویر سنگھ برداشت کریں۔ فیڈریشن نے ثالثی کی کوشش کی لیکن رنویر نے کہا کہ یہ معاملہ کسی ’مناسب فورم‘ پر حل ہونا چاہیے۔

تاہم فیڈریشن نے اپنے بیان میں کہا، ’فلمی صنعت ایک خاندان کی طرح ہے، جہاں ہر فنکار، ٹیکنیشن اور پروڈیوسر مل کر کام کرتے ہیں۔ سینئر اداکاروں کی اچانک علیحدگی صنعت کے استحکام کے لیے خطرہ ہے۔‘

چیف ایڈوائزر اشوک پنڈت نے کہا کہ یہ رجحان غلط ہے اور مستقبل میں سخت کارروائی کی جائے گی۔

علاوہ ازیں بالی ووڈ کے معروف اداکار رنویر سنگھ نے فیڈریشن آف ویسٹرن انڈیا سائن ایمپلائز کی جانب سے اپنے اوپر لگی پابندی کے بعد ردعمل کا اظہار کردیا۔

فیڈریشن نے فلم انڈسٹری سے اپیل کی کہ وہ رنویر سنگھ کے ساتھ کام نہ کرے، کیونکہ فرحان اختر نے ان کے خلاف شکایت درج کروائی تھی۔

اس کے بعد رنویر کے ترجمان نے انکی جانب سے جاری بیان میں کہا کہ رنویر سنگھ فلمی برادری اور ڈان فرنچائز سے وابستہ ہر فرد کا بے حد احترام کرتے ہیں۔

ڈان 3 سے متعلق حالیہ معاملات کے دوران انہوں نے جان بوجھ کر خاموشی اختیار کی، کیونکہ وہ سمجھتے ہیں کہ پیشہ ورانہ معاملات اور ذاتی تعلقات کو وقار، پختگی اور باہمی احترام کے ساتھ حل کیا جانا چاہیے۔ اگرچہ اس معاملے پر مختلف قیاس آرائیاں اور کہانیاں سامنے آئیں، رنویر نے کبھی عوامی طور پر جواب دینا ضروری نہیں سمجھا۔ ان کی توجہ اپنے کام اور آنے والے منصوبوں پر مرکوز ہے۔

واضح رہے کہ فیڈریشن رنویر سنگھ کے خلاف نان کوآپریشن ڈائریکٹو جاری کیا اور فلم انڈسٹری سے اپیل کی کہ وہ اداکار کے ساتھ کام نہ کرے۔ تنظیم کے مطابق رنویر کو متعدد نوٹس بھیجے گئے تھے، لیکن انھوں نے جواب دیا کہ یہ مناسب فورم نہیں ہے جہاں معاہداتی تنازع پر بات کی جائے۔ لہٰذا رنویر سنگھ کے رویے اور منصوبے سے وابستہ اسٹیک ہولڈرز کے ساتھ ان کے طرزِ عمل کو مدنظر رکھتے ہوئے فیڈریشن نے ان کے خلاف عدم تعاون پر مبنی ہدایت نامہ جاری کرنے کا فیصلہ کیا ہے۔

بیان میں مزید کہا گیا کہ فیڈریشن کے تمام پروڈیوسرز، پروڈیوسرز ایسوسی ایشنز اور انڈسٹری اداروں سے اپیل ہے کہ وہ ایسی غیر پیشہ ورانہ سرگرمیوں کے خاتمے کے لیے اتحاد کا مظاہرہ کریں۔

واضح رہے کہ شاہ رخ خان نے 2006 اور 2011 کی ڈان اور ڈان ٹو میں مرکزی کردار ادا کیا تھا۔ بعد ازاں 2023 میں اعلان کیا گیا رنویر سنگھ ڈان تھری میں مرکزی کردار ادا کرینگے۔ تاہم دسمبر 2025 میں رنویر نے دھریندر کی کامیابی کے بعد اچانک فلم چھوڑ دی، جس سے فرحان اختر اور رتیش سدھوانی کے ساتھ تنازع پیدا ہوگیا۔

بعد میں فرحان اختر نے معاملہ پروڈیوسر گلڈ آف انڈیا کے سامنے اٹھایا، لیکن گلڈ نے قانونی کارروائی کے بجائے فریقین کو باہمی طور پر مسئلہ حل کرنے کا مشورہ دیا۔ جس کے بعد فرحان نے فیڈریشن آف ویسرٹن انڈیا سائن ایمپلائز سے رجوع کیا، جس نے رنویر کو مسئلہ حل کرنے کا موقع دیا، مگر بالآخر ان کے خلاف پابندی عائد کر دی گئی۔