عمران خان سے ڈیل کا دعویٰ، رمیش کمار نے ’’نئے ماڈل‘‘ کی پیشگوئی کردی

اسلام آباد(جانوڈاٹ پی کے) پیپلز پارٹی کے رہنما اور رکن قومی اسمبلی رمیش کمار نے بانی پی ٹی آئی عمران خان کے ساتھ مبینہ ڈیل کے حوالے سے بڑا دعویٰ کیا ہے۔

رمیش کمار نے ایک انٹرویو میں دعویٰ کیا کہ عمران خان کے ساتھ ڈیل کے لیے ایک ریٹائرڈ شخصیت نے اہم کردار ادا کیا۔ ان کے مطابق عمران خان سے 4 سے 5 ملاقاتوں کے بعد 14 اگست کو باقاعدہ کیک بھی کاٹا گیا اور ریلیف کا عمل شروع ہوچکا ہے۔

پیپلز پارٹی رہنما کا کہنا تھا کہ چند دنوں میں صورتحال واضح ہوجائے گی، جبکہ ایک نیا سیاسی ماڈل بننے جارہا ہے جس پر 15 ستمبر سے 15 نومبر کے درمیان عملدرآمد متوقع ہے۔

رمیش کمار کے مطابق اس نئے نظام میں بانی پی ٹی آئی سمیت تمام اہم فریقین آن بورڈ ہیں۔ انہوں نے خبردار کیا کہ جو شخص نئے ماڈل کی راہ میں رکاوٹ بنے گا، اسے باہر کردیا جائے گا۔

انہوں نے مزید دعویٰ کیا کہ اگر مسلم لیگ ن رکاوٹ بنی یا ’’شفا والی غلطی‘‘ کی تو نیا سیٹ اپ بھی بن سکتا ہے۔

واضح رہے کہ یہ تمام دعوے رمیش کمار کی جانب سے کیے گئے ہیں؛ خبر میں ان دعوؤں کی آزادانہ تصدیق پیش نہیں کی گئی۔