امریکی وزیرِ جنگ پیٹ ہیگسیتھ کا اسرائیل کا خفیہ دورہ، نیتن یاہو سے ملاقات کا انکشاف

واشنگٹن(مانیٹرنگ ڈیسک) امریکی نیوز ویب سائٹ ایگزیوس نے دو ذرائع کے حوالے سے دعویٰ کیا ہے کہ امریکی وزیرِ جنگ پیٹ ہیگسیتھ نے اسرائیل کا غیر اعلانیہ دورہ کیا، جہاں انہوں نے اسرائیلی وزیراعظم بنیامین نیتن یاہو سے ملاقات کی۔

برطانوی نشریاتی ادارے کے مطابق امریکی محکمۂ دفاع نے اس مبینہ دورے پر تبصرہ کرنے سے انکار کر دیا، جبکہ واشنگٹن میں اسرائیلی سفارت خانے نے بھی خبر رساں ادارے کی جانب سے مؤقف جاننے کی درخواست کا جواب نہیں دیا۔

رپورٹ میں بتایا گیا ہے کہ امریکی وزیرِ جنگ کے دورۂ اسرائیل کی خبر ایسے وقت سامنے آئی ہے جب امریکی صدر ڈونلڈ ٹرمپ نے آئندہ ہفتے ہونے والے اسرائیلی پارلیمانی انتخابات میں نیتن یاہو کی حمایت کا اعلان کیا ہے۔

یہ انتخابات 7 اکتوبر 2023 کو حماس کے حملے کے بعد اسرائیل میں ہونے والے پہلے ملک گیر انتخابات قرار دیے جا رہے ہیں۔ اس حملے کے بعد اسرائیل غزہ، لبنان اور ایران سے متعلق متعدد تنازعات اور جنگی محاذوں میں الجھا رہا ہے، جس کے اثرات پورے مشرقِ وسطیٰ پر مرتب ہوئے ہیں۔

دوسری جانب امریکا میں بھی آئندہ ماہ کے آغاز میں وسط مدتی انتخابات ہونے والے ہیں، جس کے باعث خطے کی صورتِ حال اور امریکی پالیسیوں پر توجہ بڑھ گئی ہے۔

ایران کی امریکا اور اسرائیل کو تنبیہ

ایران نے امریکا اور اسرائیل کو خبردار کیا ہے کہ وہ آئندہ انتخابات کو جواز بنا کر ایران کے خلاف کسی نئے حملے کی تیاری نہ کریں۔

ایرانی فوجی حکام گزشتہ چند روز کے دوران متعدد مرتبہ دعویٰ کر چکے ہیں کہ ان کی افواج امریکا کے ساتھ کسی بھی نئے فوجی تصادم کے لیے تیار ہیں۔ ان کے مطابق اگر امریکا اور اسرائیل کے ساتھ جنگ کا نیا مرحلہ شروع ہوا تو ایران نئے فوجی اہداف اور مختلف ہتھیاروں کے استعمال پر غور کر سکتا ہے۔

امریکی وزیرِ جنگ کے مبینہ دورے اور نیتن یاہو سے ملاقات کی آزادانہ تصدیق سامنے نہ آنے کے باعث اس پیش رفت کی تفصیلات فی الحال رپورٹ میں بیان کردہ ذرائع کے دعوے تک محدود ہیں۔