پاکستان میں یوم مئی جوش و خروش سے منایا جائےگا، چوہدری منظوراحمد
لاہور(جانوڈاٹ پی کے) پاکستان میں بھی دنیا بھر کی طرح یوم مئی پورے جوش و خروش سے منایا جائے گا، جس کا مقصد محنت کش طبقے کی جدوجہد اور شکاگو کے شہداء کی قربانیوں کو خراجِ عقیدت پیش کرنا ہے۔ پیپلز لیبر بیورو پاکستان کے انچارج چوہدری منظور احمد نے کہا ہے کہ ملک بھر میں جلسے، جلوس اور سیمینارز منعقد کیے جائیں گے تاکہ محنت کشوں کے حقوق کے لیے آواز بلند کی جا سکے۔
انہوں نے بتایا کہ پنجاب، سندھ، بلوچستان، خیبر پختونخوا، گلگت بلتستان اور آزاد کشمیر میں ضلعی سطح پر ریلیاں نکالی جائیں گی، جن میں مزدور تنظیمیں اور کارکنان بھرپور شرکت کریں گے۔ ان کا کہنا تھا کہ اس وقت پاکستان میں محنت کش طبقہ شدید مشکلات کا شکار ہے اور ان پر مختلف معاشی و انتظامی دباؤ بڑھ رہا ہے۔
چوہدری منظور احمد نے کہا کہ وفاقی اور صوبائی محکموں میں نجکاری اور ملازمتوں میں کٹوتیوں کے باعث مہنگائی اور بے روزگاری میں اضافہ ہو رہا ہے، جبکہ لیبر قوانین میں تبدیلیاں بھی محنت کشوں کے لیے مشکلات پیدا کر رہی ہیں۔ ان کے مطابق ان حالات میں مزدوروں کو اپنے حقوق کے تحفظ کے لیے متحد ہو کر مشترکہ جدوجہد کرنا ہوگی۔
انہوں نے پیپلز پارٹی کی سابق قیادت کا حوالہ دیتے ہوئے کہا کہ شہید ذوالفقار علی بھٹو، شہید بے نظیر بھٹو اور صدر آصف علی زرداری کے ادوار میں محنت کش طبقے کو حقوق اور مراعات دی گئیں، جنہیں واپس نہیں لینے دیا جائے گا۔
چوہدری منظور احمد نے تمام صوبائی صدور کو ہدایت کی کہ وہ اپنے اپنے علاقوں میں یوم مئی کے پروگراموں کو حتمی شکل دے کر مرکزی سیکرٹریٹ کو آگاہ کریں۔ انہوں نے بیرون ملک موجود کارکنان اور لیبر بیورو عہدیداروں کو بھی ہدایت کی کہ وہ ریلیوں اور پروگراموں میں بھرپور شرکت کریں اور ان کی رپورٹس، تصاویر اور ویڈیوز مرکزی دفتر کو ارسال کریں۔
